Sunday, April 29, 2007

كل الف وانتوا طيبين

النهاردة كنت داخل المدونة ولاقيت العداد قفل الف و100 قلت معقولة عديت الالف بسرعة كدة ، لما بدات التدوين قلت لما اوصل للالف هعمل احتفالية كبيرة وكان الرقم دة بعييد اوى وبالمناسبة الحلوة دى سوف اتبع تقليد بالاحتفال لكل الفية نعدى عليها طبعا دى الالفية بتاعتة المدونة وسوف القى كلمة لجمهور المدونة بمناسبة هذا العيد القومى التدوينى (اشمعنا الرئيس يعنى !) .
شعب المدونة الجميل ..جوابات كتير وصلتنى بتسال اية اللى خلاك تدخل عالم التدوين وتصدعلنا دماغنا بالكلام دة
طبعا بعد التحفظ على اسماء وعناوين الناس اللى بعتت الجوابات دى لازم ارد الحقيقة انا من زمان كان نفسى فى حاجة زى المدونة لانى اول علاقتى بالانترنت كانت عن طريق المنتديات ولاول مرة كنت الاقى جروب بيهتم بنفس اهتمماتى زى السياسة مثلا واتعرفت على ناس كتير كنت اتمنى اعرفهم ولما ظهرت المدونات الحقيقة كانت اول مدونة عرفتها هى الوعى المصرى وظل التدوين مرتبط بشكل ما باسم وائل عباس ولكن سرعان ما تعدت المدونات الساحة السياسية وانتقلت الى كافة المجالات الاخرى كالفن والادب والسينما ودة غير المدونات الذاتية اللى دايما بتحكى عن مغامرات شخصية لكاتب المدونة وطبعا لانى كنت بكتب مقالات كتير فكنت سعيد اوى بالتجربة لانى مكنتش بلاقى ناس تنتقد كتاباتى او حتى تثنى عليها مكانش فى حد اصلا لية فى الكتابة لكن عالم التدوين بيقرب الناس اللى اهتمامتهم واحدة يعنى مثلا تلاقى المدونات السياسية عارفة بعض وكذلك المدونات الفنية والرياضية وكدة فكنت عايز الاقى اثر مقالاتى اية وهل انا بكتب كويس ولا لاء ولانى بعشق النقاش والجدل فكنت بحب اوى اتناقش مع الناس عن اراى واتعرف على رايهم والمدونة سمحت ليا بدة وكمان بقيت اتعرف على ناس كتير بجد اتشرفت انى عرفتهم يمكن محدش فينا شاف التانى لكن ارتبطنا بصداقة حميمة على صفحات الانترنت واتمنى ان اقابل كل هؤلاء وعلشان انا عندى امتحانات حاليا وبطلع على النت بصعوبة فانا مأجل الكلام دة فى الصيف وناوى اقابل كل المدونين فى قعدة واسعة كدة علشان نرغى براحتنا بقى ونتكلم ونتخانق براحتنا وخصوصا المدونين الليبرالين زى سوم مثلا او اى حد من طقم الطريق التالت .ههههههههه. متزعلش يا سوم انا بهزر ..بجد انا حبيت بس اشكر كل الناس اللى عرفتها وكانت بتعلق على كتاباتى وكان فعلا يهمنى رايهم وكمان احب اشكر كل المدونين اصحابى الطقم القديم زى طاهر مثلا اللى عرفونى السكة البطالة ..قصدى سكة التدوين دى ههههه...والطقم الجديد كمان زى بدوى الجديد فى التدوين طبعا مش فى المعرفة وكريم وكل الناس التانية واتمنى نتقابل كلنا فى الصيف او نخرج مع بعض لانى فعلا لاقيت الوسط الفكرى المحترم اللى كنت بتمنى الاقية فى عالم التدوين ..تحياتى للجميع وتمنياتى بنجاح اكبر لكل المدونين فى حياتهم وفى مدوناتهم. وطبعا مقدرش انسى الرفيقة العزيزة اللى ساعدتنى فى انشاء المدونة ولولاها مكنتش دخلت عالم المدونين ابدا

وكل الفية وانتو طيبين

5 comments:

kareem said...

الغالي مصطفي

تحياتي لك و لاحتفاليتك الجميلة
و يا رب ديما تكون سعيد و فرحان و عندك احتفالات و عبقال المليون زائر

و انا كمان سعيد بمعرفتك و ربنا يوفقك ف الامتحانات و تقضي اجازة سعيدة و تقابل كل الناس الحلوة اللى قولت عليها

كريم

GayofSun said...

إلى جميع الأخوة و الأخوات
زميلتنا المدونة وينكي تعرضت لموقف خطير أدى لحذف مدونتها، و مما تسبب لها باحباط شديد فقررت ترك الكتابة إلى الأبد و اعتبرت نفسها ميتة
و لأننا نحن المدونون كلنا يد واحد و رزمة أقلام مجتمعة، أتمنى أن تشاركونا بهذه الحملة لاقناع وينكي العزول عن موقفها السلبي و لمعرفة ما حصل معها تماما
رابط الحملة وينكي لن تموت من هنا
أرجو من الجميع مساندة الأخت وينكي
http://gayofsun.blogspot.com/2007/04/blog-post_29.html

مصطفى محمود said...

عزيزى كريم :

شكرا يا جميل وربنا يخليك وانت بجد من الناس اللى سعدت بمعرفتها اوى ومدونتك من المدونات المتميزة فعل اتمنى لك السلام والسعادة يا صديقى

جاى اوف صن :

اهلا بيك فى المدونة نورتنا ...وكلنا ان شاء الله مع وينكى ويارب ترجع تكتب تانى

تحياتى

freeze said...

الفيــــــــــــــة سعيدة عليك وعلي كل الناس الحلوة اللي مشركاك المدونة والنجاح .. وانا بالنيابة عن مصطفي صاحبي واخويا احب اقول شكرا لكل من ساهم ولو بالرد في المدونة دي علشان بجد كل رد او تعليق او تشجيع كان دافع لمصطفي انة يحسن في المدونة دي و يبص لقدام اكثر وانا بقول الكلام دة علشان انا شايف اثرة علي مصطفي بجد وحاسس اد اية هو سعيد بيكوا وبالمدونة ومشاركتة النجاح

ويا رب يوفق الجميع
انا طولت مش كدة مش مهم استحملوني علشان هتشوفوني هنا كتير :)

مصطفي مدونتك جميــــــــــــــــلة :)


مبروك علي المدونة

Keep it Up

luv. freeze

A/kader_y...! said...

عقبال المليون زائر صديقي
طريقة معالجتك للمواضيع متميزة جدا
و تستحق ان يقرا لك الجميع
تقبل تحياتي