Friday, April 27, 2007

الحاوى


يوم الاربع كنت رايح اتفرج على الماتش مع اصحابى وصمموا انة لازم اروح المعادى ونشوف الماتش فى شاشة ضخمة يعنى هى القهاوى العادية اللى جنبنا كفرت ! لكن لزوم الماتش واللمة بقى طبعا فى ناس بتسال وانت من امتى بتهتم بالكورة يعم الامور الحقيقة يا جماعة ان مشجع كورة على ماتفرج يعنى مثلا بحب اتفرج على ماتش مهم مثلا الاهلى والزمالك او منتخب مصر وهو بيلعب او مباراة زى اللى فاتت دى بين الاهلى وبرشلونة يعنى بحب التفرج فى الماتشات المهمة والغريب بقى انى لو اتفرجت لوحدى فى البيت ممكن اتخنق واغير المحطة لكن لازم اتفرج مع اصحابى علشان احس بحماس الماتش وكدة المهم روحنا وقعدنا بقى وشربنا شاى طبعا كنا مستنين الماتش الساعة 7 اتارى الماتش هيبتدى 9.5 طبعا قلت هو اليوم دة باين من اولة الشاشة الشخمة بتاعتهم دى كانت شغالة مصارعة لحد 9.5 لما اتخنقت واخيرا بقى ابتدى الماتش لسة يادوبك اللعيبة داخلة والاقى مبارك قاعدلى فى المقصورى ومقعد حفيدة على رجلة وعلى يمينة نظيف وعلى شمالة طنطاوى (وزير الدفاع) قلت يعنى انا سايب السياسة وجاى اتفرج على ماتش الاقى الراجل دة ورايا برضة روحت قلت لاصحابى يا جماعة الراجل دة قدمة فقر وهينحسلنا المباراة قالولى اسكت علشان متتخطفش من وسطينا طبعا سكت علشان نكمل الماتش بصرتحة ياشباب انا كان صعبان علية لعيبة الاهلى تخيلوا كدة ابو تريكة ومتعب والحضرى واقفين قصاد مسى واتو ورينالدينهو ياخبر ابيض مشهد يخض بجد وكنا فى اول المبارة بنهجم وبتنشوط كدة راحو رازعينا جونين عجب ودة كلة ومسى ورينالدينهو فى الاحتياطى قلت اشطة كدة خلصت يا مان وهنتهزق والواد الحاوى دة رينالدو لقيتة بيمضى على الكاميرا كانة بيعلم علينا مثلا وبصراحة عندة حق دة طول الماتش بيضحك وسعيد ولا كانة فى تدريب ! المشكلة مش فى كدة الواد ابن الجنية دة كان بيشوط الكورة وبتلف وبتعمل حركات غريبة ورقص لوحدة اربعة من الدفاع بتاع الاهلى وفى الاخر باصيها لواحد دخلها جون بسهولة بجد انا تجننت الواد دة يا مخاوى يا بيعمل اعمال لان الحركات دى مش طبيعية و الغريب بقى الناس بقت تشجع برشلونة ياربنا مفيش اخلاص حتى للفريق بتاعنا ونصيحة للاهلى لو هنلاعب برشلونة تانى يبقى اى حد يقتلنا الواد دة واهوة بردة الداخلية هتقول انة واحد مختل هو اللى قتلة اهى تبقى خدمتنا فى الكورة برضة والمضحك ان الجرايد تانى يوم قالت ان الناس مزععلتش لان الاهلى اتغلب وفرحت لان الرئيس جة !! والله يا جماعة انا قلتلكم ماهى اقدام .

9 comments:

حسام مراد said...

بص يا باشا الماتش ده اجى صدمه للاهلاويه اللى كانوا فاكرين ان فريقهم عالمى ولايقهر ونسو ايتو وديكو ورونالدينيو وميسى والعالم دى خالص وافتكروا احمد السيد وبركوته وشادى محمد والعالم دى
شوفت الفرق
وهما اخرهم يفتروا على الفرق الغلبانه اللى فمصر
يلا سلام ياباشا
تنويه : انا بعشق قصيده على اسم مصر للعبقرى صلاح جاهين
فاول ما تلاقيت مدونه اسمها على اسم مصر قلت لازم ادخل واعلق
سلاااااااااااااااااااااام

مصطفى محمود said...

اولا اهلا بيك يا حسام

ثانيا شكلك زملكاوى بس ماشى يعم هنعديها بس الموضوع حضرتك اننا من حقنا نحلم نعمل اى حاجة بدل ما نياس ونبقى زى نادى الزمالك مثلا الى خلاص تقريبا هينزل دورى شركات

وبخصوص اسم المدونة انا فعلا اخترتها علشان قصيدة صلاح جاهين

ونورت مصر ..اقصد على اسم مصر

Anonymous said...

هاى ازيك
انا مثلى قوى وانا قريت اللى انت كاتبه وضحكت اوى
لاقيت مبارك حته فى المطش يعنى السياسه
ورانا ورانا
ونظيف طبعا جمبه اللى منضف البلد
على فكره انا اهلاوى
بس عندى انتماء بس هتعمل ايه الناس زى منت قلت شجعت الفريق اللى ضد الاهلى
اما عن رايك فى ينالدو فهو فعلا ابن جنيه زى منت قلت
وسفاح كوره
ربنا سبحانه وتعالى اداله الموهبه
المهم انك كنت يبتلى تعليق عندى على المدونه بتاعتى
بس ظهر جوه فى اللوج ان
مش عارف ليه التعليقات اللى بتوصل
للبلوج بتاعى بتجى على جوه ومش بتظهر على العداد بره حته
بس انا كنت عاوز اسالك نفس السوال اللى سالتهولك المره اللى فاتت على الموضوع السابق
انت شيوعى او ملحد
ولا مسلم
انا عاوز اعرف وعادى ياعم احنا اصحاب
وانا عاوزك تدخل وتبعت رايك وتعليقك على مدونتى انت بيتهيالك انها مش بتوصل لكن التعليقات بتوصلى
جوه فى اللوج ان وبدعو كل الموجودين انهم يدخلوا ويقراو موضوعاتى ويعلقوا عليها وعنوان الرابط هوhttp://mthlykaweyy.blogsome.com/
هستنى تعليقك وتعليقكم كلكم
وياريت تجوبنى على سوالى
انت ملحد او سيوعى ام مسلم
هنتظر تعليقتكم على مدونتى
صديقكم مثلى قوى

Anonymous said...

انا صديقك مثلى
قوى وعلى
فكره بالرغم من مثليتى
وكل حجه الا انى مومن بالله
وانا كنت عاوز اقول ده لكل الموجودين اللى هنا
انا مومن بالله الواحد
منتظر تعليقاتك مصطفى وتعليقات كل اللى هنا انتم مدعوون وياريت تردلى على سوالى
انت شيوعى ملحد ام مسلم
منتظر الاجابه
صديقك مثلى قوى

مصطفى محمود said...

اهلا بيك يا صديقى وانا بجد اتحرق دمى زى كل الناس اللى شافت الماتش لكن الاهلى بردة فريقنا هنعمل اية ،

وياعزيزى مش معنى انى اشتراكى ابقى ملحد !! عزيزى انا مسلم والاشتراكية مش اكتر من نظام ادارى واقتصادى زى الراسالية اللى احنا عايشين فيها وفى اشتراكيين ملحدين ومسلمين ومسيحين مش شرط يعنى اكون ملحد ...انا مسلم

تحياتى

kareem said...

الغالي مصطفي

صديقي اولا احب اعرفك انى ماليش ف الكورة خالص و لا بحب اتفرج على متشات بس مش ده المهم

المهم و تعليقا على موضوعك
ليه يا صديقي معتقد اننا هنكون متفوقين ف الكورة ... كل المجالات تؤدي الى بعضها و كلها نتاج المناخ العام بتاع المجتمع ... و معتقدش ان المناخ العام يفرز عباقرة او متفوقين في اى مجال و لا حتى الكورة الشراب

ثانيا عجبني قوى موضوع ان الجماهير المصرية بقت تشجع الفريق التاني
و ده اكبر دليل ان فيه شىء غلط ف المجتمع المصري
و على راي بثينة ف عمارة يعقوبيان
وطنية ايه يا زكي باشا

و بردة لازم نشعر بالمشكلة علشان نلاقي الحل
و الواضح اننا لا نعاني اى مشاكل
و مفيش مشكلة و لو فيه مشكلة يبقا مفيش مشكلة اصل المشكلة ان مفيش مشكلة يبقا ايه بقا المشكلة ؟؟

فهمت حاجه ؟؟

هههههههههههههه

كريم

مصطفى محمود said...

ياكريم يا اخويا المسالة مش انتظار معجزة من فريقنا بس يعنى الواحد كان عندة امل وكنت يعنى عايز افصل من السياسة شوية مااهو انا لو فضلت احسبها كدة 24 ساعة هتجيلى جلطة او ذبحة صدرية واموت ...فساعات يعنى بحب اروح عن نفسى شوية عموما ربنا يهدى الجميع وخصوصا النادى الاهلى .هههههههه

freeze said...

يا جماعة الماتش دة كان مسخرة بجد .... :) الماتش من اولة لاخرة كان غريب والاغرب زي ما مصطفي قال ان لما كان بيجي جون فينا كان الناس اللي قاعدة بتشجع وتصفق لبرشلونة وكأننا بنتفرج علي ماتش في الدوري الانجليزي مش فريق من بلدنا هو اللي بيلعب وعلي فكرة يا جماعة انا اللي اصريت اننا نتفرج علي الماتش في المعادي :) ومعلش يا مصطفي اني قلتلك ان الماتش الساعة 7:30
هههههه عادي بقي ما احنا اصحاب :)

وعامة مبروووووووووووووووووك علي المدونة الجميلة دي بالرغم من انها جت مني متاخرة كتير بس يلا الواحد يجي متاخر احسن ميجيش خالص ... ولا اية ؟
وعلي فكرة علشان تاخيرة دة انا قررت اكتبلك مبروك في كل موضوع :) شفت بيقي انا غلس .. قصدي جدع ازاي
ســـــــــــــــــــــــــلام

عمرو غريب said...

الفعل هذا الاعب ما حصلش تحياتي عمرو غريب من مدونة بيت الرياضة المصرية