Sunday, April 29, 2007

كل الف وانتوا طيبين

النهاردة كنت داخل المدونة ولاقيت العداد قفل الف و100 قلت معقولة عديت الالف بسرعة كدة ، لما بدات التدوين قلت لما اوصل للالف هعمل احتفالية كبيرة وكان الرقم دة بعييد اوى وبالمناسبة الحلوة دى سوف اتبع تقليد بالاحتفال لكل الفية نعدى عليها طبعا دى الالفية بتاعتة المدونة وسوف القى كلمة لجمهور المدونة بمناسبة هذا العيد القومى التدوينى (اشمعنا الرئيس يعنى !) .
شعب المدونة الجميل ..جوابات كتير وصلتنى بتسال اية اللى خلاك تدخل عالم التدوين وتصدعلنا دماغنا بالكلام دة
طبعا بعد التحفظ على اسماء وعناوين الناس اللى بعتت الجوابات دى لازم ارد الحقيقة انا من زمان كان نفسى فى حاجة زى المدونة لانى اول علاقتى بالانترنت كانت عن طريق المنتديات ولاول مرة كنت الاقى جروب بيهتم بنفس اهتمماتى زى السياسة مثلا واتعرفت على ناس كتير كنت اتمنى اعرفهم ولما ظهرت المدونات الحقيقة كانت اول مدونة عرفتها هى الوعى المصرى وظل التدوين مرتبط بشكل ما باسم وائل عباس ولكن سرعان ما تعدت المدونات الساحة السياسية وانتقلت الى كافة المجالات الاخرى كالفن والادب والسينما ودة غير المدونات الذاتية اللى دايما بتحكى عن مغامرات شخصية لكاتب المدونة وطبعا لانى كنت بكتب مقالات كتير فكنت سعيد اوى بالتجربة لانى مكنتش بلاقى ناس تنتقد كتاباتى او حتى تثنى عليها مكانش فى حد اصلا لية فى الكتابة لكن عالم التدوين بيقرب الناس اللى اهتمامتهم واحدة يعنى مثلا تلاقى المدونات السياسية عارفة بعض وكذلك المدونات الفنية والرياضية وكدة فكنت عايز الاقى اثر مقالاتى اية وهل انا بكتب كويس ولا لاء ولانى بعشق النقاش والجدل فكنت بحب اوى اتناقش مع الناس عن اراى واتعرف على رايهم والمدونة سمحت ليا بدة وكمان بقيت اتعرف على ناس كتير بجد اتشرفت انى عرفتهم يمكن محدش فينا شاف التانى لكن ارتبطنا بصداقة حميمة على صفحات الانترنت واتمنى ان اقابل كل هؤلاء وعلشان انا عندى امتحانات حاليا وبطلع على النت بصعوبة فانا مأجل الكلام دة فى الصيف وناوى اقابل كل المدونين فى قعدة واسعة كدة علشان نرغى براحتنا بقى ونتكلم ونتخانق براحتنا وخصوصا المدونين الليبرالين زى سوم مثلا او اى حد من طقم الطريق التالت .ههههههههه. متزعلش يا سوم انا بهزر ..بجد انا حبيت بس اشكر كل الناس اللى عرفتها وكانت بتعلق على كتاباتى وكان فعلا يهمنى رايهم وكمان احب اشكر كل المدونين اصحابى الطقم القديم زى طاهر مثلا اللى عرفونى السكة البطالة ..قصدى سكة التدوين دى ههههه...والطقم الجديد كمان زى بدوى الجديد فى التدوين طبعا مش فى المعرفة وكريم وكل الناس التانية واتمنى نتقابل كلنا فى الصيف او نخرج مع بعض لانى فعلا لاقيت الوسط الفكرى المحترم اللى كنت بتمنى الاقية فى عالم التدوين ..تحياتى للجميع وتمنياتى بنجاح اكبر لكل المدونين فى حياتهم وفى مدوناتهم. وطبعا مقدرش انسى الرفيقة العزيزة اللى ساعدتنى فى انشاء المدونة ولولاها مكنتش دخلت عالم المدونين ابدا

وكل الفية وانتو طيبين

Friday, April 27, 2007

الحاوى


يوم الاربع كنت رايح اتفرج على الماتش مع اصحابى وصمموا انة لازم اروح المعادى ونشوف الماتش فى شاشة ضخمة يعنى هى القهاوى العادية اللى جنبنا كفرت ! لكن لزوم الماتش واللمة بقى طبعا فى ناس بتسال وانت من امتى بتهتم بالكورة يعم الامور الحقيقة يا جماعة ان مشجع كورة على ماتفرج يعنى مثلا بحب اتفرج على ماتش مهم مثلا الاهلى والزمالك او منتخب مصر وهو بيلعب او مباراة زى اللى فاتت دى بين الاهلى وبرشلونة يعنى بحب التفرج فى الماتشات المهمة والغريب بقى انى لو اتفرجت لوحدى فى البيت ممكن اتخنق واغير المحطة لكن لازم اتفرج مع اصحابى علشان احس بحماس الماتش وكدة المهم روحنا وقعدنا بقى وشربنا شاى طبعا كنا مستنين الماتش الساعة 7 اتارى الماتش هيبتدى 9.5 طبعا قلت هو اليوم دة باين من اولة الشاشة الشخمة بتاعتهم دى كانت شغالة مصارعة لحد 9.5 لما اتخنقت واخيرا بقى ابتدى الماتش لسة يادوبك اللعيبة داخلة والاقى مبارك قاعدلى فى المقصورى ومقعد حفيدة على رجلة وعلى يمينة نظيف وعلى شمالة طنطاوى (وزير الدفاع) قلت يعنى انا سايب السياسة وجاى اتفرج على ماتش الاقى الراجل دة ورايا برضة روحت قلت لاصحابى يا جماعة الراجل دة قدمة فقر وهينحسلنا المباراة قالولى اسكت علشان متتخطفش من وسطينا طبعا سكت علشان نكمل الماتش بصرتحة ياشباب انا كان صعبان علية لعيبة الاهلى تخيلوا كدة ابو تريكة ومتعب والحضرى واقفين قصاد مسى واتو ورينالدينهو ياخبر ابيض مشهد يخض بجد وكنا فى اول المبارة بنهجم وبتنشوط كدة راحو رازعينا جونين عجب ودة كلة ومسى ورينالدينهو فى الاحتياطى قلت اشطة كدة خلصت يا مان وهنتهزق والواد الحاوى دة رينالدو لقيتة بيمضى على الكاميرا كانة بيعلم علينا مثلا وبصراحة عندة حق دة طول الماتش بيضحك وسعيد ولا كانة فى تدريب ! المشكلة مش فى كدة الواد ابن الجنية دة كان بيشوط الكورة وبتلف وبتعمل حركات غريبة ورقص لوحدة اربعة من الدفاع بتاع الاهلى وفى الاخر باصيها لواحد دخلها جون بسهولة بجد انا تجننت الواد دة يا مخاوى يا بيعمل اعمال لان الحركات دى مش طبيعية و الغريب بقى الناس بقت تشجع برشلونة ياربنا مفيش اخلاص حتى للفريق بتاعنا ونصيحة للاهلى لو هنلاعب برشلونة تانى يبقى اى حد يقتلنا الواد دة واهوة بردة الداخلية هتقول انة واحد مختل هو اللى قتلة اهى تبقى خدمتنا فى الكورة برضة والمضحك ان الجرايد تانى يوم قالت ان الناس مزععلتش لان الاهلى اتغلب وفرحت لان الرئيس جة !! والله يا جماعة انا قلتلكم ماهى اقدام .

Sunday, April 22, 2007

عندما يكون الدين افيونا






كثير من الناس عندما تسمع هذة العبارة يتولد لديها شعور سلبى تجاهها وهى ( الدين افيون الشعوب )
بالطبع كلنا سمعنا هذة العبارة وسيجيب الكثيرين ان ماركس يعنى بها مهاجمة الدين والدعوة للالحاد ولكن لو استكملنا معا النصف الثانى من العبارة (الدين افيون الشعوب وزفرة المستضعفين فى الارض) هل تغير شىء؟ هل تغير المعنى؟ حسنا الى من لم يلاحظ ماركس عندما قال هذة العبارة لم يكن الافيون فى ذلك الزمن سوى مسكن للالام ، لم يكن يقصد مهاجمة الدين بذاتة ولكن عنى هنا رجال الدين الذين يحرصون على استغلال الدين فى قلوب وعقول الناس لتحقيق مصالح الطبقات البرجوازية المستفيدة من تخدير الشعوب عن حقوقهم المسلوبة . فقط اريد ان استرجع معكم كيف يأفن الدين فى المجتمع لخدمة طبقة معينة ، عندما نشاهد فى التلفاز شيوخ وأئمة يتحدثون للفقراء ويطالبونهم بالصبر والقناعة وعدم التظر الى ما فى يد الغير ويبشرونهم بانهم سيدخلون الجنة قبل الاغنياء ب70 خريفا ! عندما نشاهد فى انتخابات الرئاسة جمعية تطلق على نفسها
(انصار السنة) تؤثم المرشحين التسعة (طبعا ما عدا مبارك*) لانهم ينافسون مبارك ويستندون الى حديث يقول:عاهدنا رسول الله الا ننازع الامر اهلة ...!! وبغض النظر عن صحة او ضعف الحديث فهذا موقف يلفت انتباهنا لشىء هام وهو ان بعض الناس تطوع الدين كيفما تشاء ليتلائم مع رغبات الحكام وليس هذا فقط بل وتعمل على ممارسة الدجل المنظم على العامة لتقنعه باوهام سخيفة ومثيرة للشفقة ..وربما اقرب مثال لذلك عندما يخاطبنا احد الدعاة وهو يقول ان سبب ما نحن فية من بلاء هو ان الله غاضب علينا ! وعندما نشاهد لبنان تئن تحت القصف الاسرائيلى ونشاهد المدنيين يقبرون تحت انقاض منازلهم وسط تخاذل بل وتشجيع الانظمة العربية لاسرائيل نجد العلماء قد اجهشوا بالبكاء ثم يصعقونا بفتوى تثقل كاهل المؤمنين الذين يراودهم حلم الجهاد بان التماثيل حرام ! هكذا تمخض الجبل ثم ولد فأرا كما يقولون هذا ما اتت بة قريحة وعلم هؤلاء الدعاة فى هذا التوقيت بالذات ، وعندما يحترق الناس فى مسارح قصور الثقافة لا نجد (العلماء) قد اهتموا بهذا الامر التافة ولكن عندما تحدث وزير الثقافة عن راية فى الحجاب هنا فقط تهتز الارض ويزأر الدعاة للدفاع عن الحجاب من اعداء الله ولكن هل راى شخص عن الحجاب اهم عند الله من احراق بعض عبادة احياء وبسبب هذا الشخص؟ سؤال مهم ولكن اجابتة معروفة فاحتراق بعض الاشخاص هو امر عادى اما الحديث عن الحجاب فهو هوجة وسبوبة وربما من الحماقة للادعياء ان يخرجون من هذا المولد بدون لقاء مع تلك المذيعة او حديث ساخن لهذة الجريدة وليحترق ممثلين بنى سويف ..من يهتم؟ العامة تريد الحديث عن الحجاب فلنغرقهم فى هذا الحديث فليذهب كل من يريد حرماننا من رزق القنوات الفضائية الى الجحيم . وعندما نرى ايضا حديث بعض الاشخاص عن شجرة مباركة ويسافر اليها الكثير من طالبى البركة والطواف حولها بل وترسل مؤسسات دينية مرموقة وفد لدراسة الشجرة هنا نكون امام مجتمع يلجأ للخرافة ليهرب من الواقع مجتمع يقبل ان يتعايش مع الوهم اى خيال ولكن بعيدا عن الواقع المؤلم وعندما نرى ايضا شيوخ افاضل يفتونا بعد ان شكونا اليهم جور حكامنا بان الاسلام يامرنا بان لا نخرج عن الحاكم الظالم مهما طغى وتجبر وحتى لو تقلد السلطة غصبا حتى لا تعم الفوضى وتضيع الاخلاق! عندما نسمع ونرى هذا فى مجتمع ما فنحن امام افيون ولكنة ليس مخدرفقط انة يذهب العقل ويزهق الروح ويقتل النفس فى سبيل رغبات طبقة معينة تتمتع بكل الثروات والخيرات على حساب الكادحين الذين يفترشون الارض فى صفوف لجلب الدفأ عوضا عن غطاء غير موجود وصوما عن طعام غيرمتاح وعندما يفكرون فى سبب فقرهم وشقائهم سرعان ما نجد كتيبة الدجل تنصحهم بالصبر للحصول على حور العين واللبن والخمر وما يشتهون من اكل وان الحل هو مزيد من الصبر وان فرج الله قريب! على الجانب الاخر من المجتمع نجد اناس مختلفين تماما فبينما يتشارك العشرات كيلوا لحمة يتافف البعض من رداءة نوع الكافيار او السيمون فيمية ولان هؤلاء الناس مستفدين من ذلك الاستغلال وتلك الاوضاع فهم يحرصون على تقريب رجال الدين اليهم (اى دين) لمشاركتهم بعض الامتيازات مقابل خداع وتضليل الجماهير ولهذا لا يجب ان نعجب اذا راينا البابا شنودة وشيخ الازهر يؤيدون الرئيس مبارك فى انتخابات الرئاسة ويجددون لة البيعة . تلك الامراض النفسية والافكار السامة التى تبثها تلك الطبقة عن طريق رجال الدين وعبر وسائل الاعلام تسعى لهدف واحد تخدير الجماهير وغفلتهم عن حقوقهم المسلوبة انهم يريدونا ان لا نفكر لماذا ينعم الالاف بثروات هائلة بينما تموت الملايين من الجوع . ايها الناس الله ليس غاضب عليكم فهو رحيم ويحب الخير لعبادة ..الله لايريد احد فقيرا لانة اوجد ثروات تكفى اربعة اضعاف سكان المعمورة ولكن الفقر والجوع والقهر هو نتيجة تحكم قلة من البشر الانتهازيين فى موارد وثروات الشعوب، لهذة الدرجة من الوقاحة نجد اناس يقتلون ويسرقون ويحرقون ثم ينسبوا ذلك الى الله مدعين انة يريد ذلك ! ان سبب جوعكم وفقركم وقهركم هو طبقة البرجوازيين التى تعمل على استغلالكم باسم الدين ..ارفضوا تعاطى ذلك الافيون.. انفضوا عنكم هذا الدجل ..ثوروا يرحمكم الله فالثورة من الايمان .

Monday, April 16, 2007

مشاهدينا الكرام

اعزائى المشاهدين انهاردة عايزين نتكلم فى موضوع علشان الناس بعتت واشتكت يعنى

وخصوصا الاطفال اللى من 4 سنين ل 85 سنة

الناس يتساءلون يهمهمون (ماشى حالك ماهو مفيش حد فاهم حاجة ) يهرلون عن المواضيع القديمة (حلوة قديمة دى) قصدى السابقة على من يريد مشاهدة التدوينات السابقة فليتبع التعليمات الاتية :

اولا تدخل على المدونة شوفتوا سهلة ازاى

ثانيا على اليمين تحت كلمة (سرى للغاية) هتلاقى الارشيف بتاع المدونة وهتلاقى سهم علية اسم شهر ابريل او يناير مثلا دوس على السهم هتلاقية فتحلك المواضيع اللى فى الشهر دة

وعلى راى نيللى:


الدنيا عجايب فى الصندوق!


ومع السلاموعليكوم.

Saturday, April 7, 2007

عملتها يا محمود

ما تم نشرة عن طريق الدكتور محمود امين العالم يفترض عدة امور :


1- ربما يكون الامن يعرف شيئا فعلا عن هذا التنظيم ولكنها معلومات بسيطة ومحروقة ..فمثلا من المعروف ان رجال المخابرات بين الدول عادة يعرفون بعض شخصيا بل ويعلمون العديد من (البيوت الامنة ) التابعة للدول الاخرى ولكنهم يراقبون بعض ع حذر ..وكضلك يبدو الحال لدى الامن المصرى انة يعرف مبدئيا بوجود تنظيم وان لة تشكيلات وبالطبع هذا تنظيم سرى وبة عناصر يسارية وربما تكون هى وراء اضرابات العمال الاخيرة ولكن اين هو الهيكل الحقيقى ؟ واين هو الزعيم؟ او الكوادر القيادية ؟ وما هى الافكار والمبادىء؟ فهذا هو السؤال ...وذلك لا ينفى انهم يعرفون اشخاص بعينهم منتمين لذلك التنظيم فعلا.
2- ربما هى مجرد (شو) او عرض اعلامى يريد ان يسوق بة الدكتور محمود للحزب الشيوعى المصرى ولليسار عامة وينسب لنفسة او (لهم!) فضل تلك الاضرابات التى حدثت مؤخرا بين صفوف العمال ليعلن ولو بطريقة دعائية ان اليسار المصرى قوة مؤثرة فى الشارع المصرى ويجب التنسيق معة حتى يؤكد عدم انفراد الاخوان بالساحة السياسية .
3- الفكرة الاكثر سوداوية هى ان يكون ذلك التنظيم سرى فعلا ولم يعد كذلك بعد اعلان الدكتور محمود ..ولاشك انة بعد اقرار قانون الارهاب فذلك يعنى دعوة مفتوحة للامن ليقطفوا كوادر اليسار المصرى بدون ادنى اعتراض فمن سيتعاطف مع شيوعيين !! وكمان عاملين تنظيم سرى !! الامر الذى يعنى (اذ اخذ كلام د. محمود محمل الجد) عن التحضير الامنى لضربة استباقية لليسار المصرى ولكنهم سوف ينتظرون حتى تهدأ عاصفة التعديلات والمحاكم العسكرية للاخوان ..حتى تنضج الثمرة وتطيب لهم ولا شك ان الحملة سوف تبدأ بهذةالصورة : الاهرام صفحة اولى ومانشيت عريض : القبض على تنظيم سرى لمجموعة من الشيوعيين والتحفظ على كمية سلاح كبيرة وبجانب المقال صور للسلاح المتحفظ علية ..والذى لن يكون فى الغالب الا مجموعة مسدسات ورشاشات متوسطة الحجم وذخيرة حية ( كالعادة ) وصور زكنوغرافية لبعض الاوراق (السرية ) للتنظيم تحيطة بدوائر حمراء تحت كلمات على غرار ( نسف مقرات الشرطة ---احتلال مجمع التحرير- الاستيلاء على وزارة الدفاع ) ثم يصعقنا سرايا بمانشيت ساخن ( الديمقراطية لها انياب)!! او (لهذا ايدنا قانون الارهاب ) ! بعد ذلك تتوالى الاساطير والروايات الفضائية عن ضبط مدافع هاوتزر لدى التنظيم ولا مانع من بعض الغواصات ومدرعات الية وبعض الاباتشى والهيداس وصناديق من القنابل والكلاشينكوف..سوف يعلنون عن كمية سلاح تكفى لتحرير العراق..، يتبع ذلك حملات عنيفة على اليسار المصرى ثم يتوالى القبض على العناصر اليسارية او اى شخص لة اتجاهات حمراء وربما اعتقلوا من يمشى على يسار الشارع اومن يشاور بيسارة لاى احد! وسوف يتم غلق معظم مدونات اليساريين والبلد هتفضى من اليساريين علشان ترتاحوا!! متشكرين يا د.محمود.

بالبلدى

فى الاوساط الحزبية والسياسية غالبا ما تجد اشخاص لديهم افكار ونظريات غريبة ومختلقة وهى عادة ما تكون نتاج طبيعى لعقول مختلة وتعبر عن انحطاط فكرى نادر الوجود واعنى هنا من يدعون الليبرالية فى تلك الاوساط ، انا احترم جدا المختلفين معى فى الراى فاذا كنت ليبرالى او اخوان فرغم اختلافى معك فانا سوف احترمك لانك لديك فكر ما وتتناقش حولة وبديهى ان تكون فاهم ومستوعب لذلك الفكر الذى تدافع عنة اما ان تكون مدعى لفكر معين وانت لاتفقهة فية اى شيئا هذا هو الانحطاط ولقد صادفت هؤلاء كثيرا فعندما اسالة عن راية فى التطبيع فانة يرفض ذلك بشدة وعندما اقول لة ان الليبرالية تدعو للفردية وللنفعية وعلى هذا فلا يوجد ليبرالى ضد التطبيع فاجدة يعاند ويقول ان الليبرالية ليست كتاب مقدس ويمكن ان نختلف عنها حسنا هذا جميل ولكنك لا تستطيع ان تختلف فى اسس جوهرية لليبرالية فاذا ما قننت دولة ما الدعارة ورفضتها اخرى فلن يكون ذلك انتقاصا من ليبراليتها فهذة جزئيات وتفاصيل صغيرة ولكن ان تقول لى انك ضد التطبيع ولست علمانى وعندما اقول لك ان الراسمالية تؤدى الى الفقر والحروب والمجاعات تقوول لى انك طريق صلاح سالم ..عفوا طريق ثالث !! بل واوقح من ذلك تريد ان تقنعنى بان هذا النظام هو مزيج بين الليبرالية والشيوعية !! ماهذة الروائع ، وبعد مناقشة قصيرة اجدة يوافق على العمل الماجور وسياسات العولمة الاقتصادية ونظام السوق الحر ولكنة يريد ان يكون التعليم مجانى كذلك التامين الصحى واعانات البطالة.! اذن انت راسمالى ولكنك تعاند عناد احمق ليس الا ثم مالذى تتصورة عن الاشتراكية لكى تحصرها اصلا فى مجانية التعليم والتامين الاجتماعى ..الخ . انها نظام متكامل ولايقبل المساومة ..وهكذا بعد فصال مرير اجدة يقول لى انة ليبرالى رغما عن انفى
، قل لى انك لم تستقر بعد على فكر معين قل لى ان لك وجهة نظر اخرى ولكن ان تدعى انك ليبرالى ثم تخالفها جملة وتفصيلا فانت تهذى . انها ليبرالية بالبلدى !

Monday, April 2, 2007

رسالة من مؤتمر القاهرة


انتهى امس فعاليات مؤتمر القاهرة الدولى فى دورتة الخامسة
ولقد اسعدنى تواجدى فى المؤتمر هذا العام بصفتى واحد من الطلاب الاشتراكيين ..واحد من المناضلين حول العالم عن الفقراء والجوعى والمشردين ضد سياسات الافقار والحروب التى تمارسها بكل وقاحة القوى الامبريالية العالمية ، ولقد اسعدنى اكثر لقائى بوفود الاشتراكيين الاجانب من كل العالم من فنزويلا حيث القى علينا تشافيز تحية نضالية لليسار المصرى ومن انجلترا حضر جون مولينو صاحب كتابى
ماذا نعنى بالمجتمع الاشتراكى و ما هو التراث الماركسى الحقيقى الذى فند فية تحريفات الاصلاحين والستالينين والحقيقة عندما رايتة لم اكن متصور ان هذا الضخم هو جون مولينو ولكنة لطيف للغاية وحضر ايضا وفود من ايطاليا وتركيا واليونان ولبنان والدنمارك وكوريا والاخير كان الكثر حضورا وتفاعلا وحازعلى اعجاب الجميع والذى فاجئنا برفعة بوسترات عليها صور لمبارك وتحتة شعار (ديكتاتور الليبرالية الجديدة) وعندما سالت الرفيقة تايا كين
عندما عرضت لى صور عن تظاهرهم امام السفارة المصرية فى كوريا الجنوبية وهم يرفعون شعارات كفاية بالعربية والكورية ، كيف تعرفين مبارك وكيف نظمتم مظاهرات ضدة قالت لى ان قوى الراسمالية العالمية تتكاتف جميعا من اجل سحق كل المناضلين فى العالم وخاصة اليسار وكما وحدت العولمة الدول الراسمالية وحدت ايضا وبدون قصد بين ضحايا العولمة فى كل العالم وكما تحالفت القوى الامبريالية ضد العراق وافغانستان يجب ان نوحد جهودنا ونصعد نضالنا على مستوى العالم للرد على تلك الهجمة البربرة الشرسة .انتهى كلام الرفيقة تايا . وبلا شك قد رفع هذا من عزمى تماما حتى عندما هتفنا ضد مبارك واسرائيل وامريكا رغم عدم فهمهم للعربية الا انهم شاركونا الهتاف بعربية ركيكة لغاية ولكن بروح اشد عزما وقوة ..الحقيقة انى شعرت خلال هذا المؤتمر بشعور مختلف تماما وربما لاول مرة فى حياتى ..عندما تلاقى كل الرفاق من كل البلاد لتاييد المقاومة فى فلسطين والعراق ، ولكفاحنا ضد عدو واحد
الراسمالية
الامبريالية
الحروب
ولهدف واحد
نسف النظام الراسمالى باخر اكثر عدالة ..واكثر انسانية ..الاشتراكية
وسط كل هذة الاجواء المشحونة بروح المناضلين الرفاقية شعرت اخيرا بكلمة كنت ارددها دائما ولكن لم اتذوقها من قبل ...انها الاممية يا رفاق
شعرت بها اكثر عندما ارتفعت قبضاتنا جميعا ونحن نهتف:
1 solution
red revolution
الاممية ليست مجرد كلمة او شعار ولكة تحالف حقيقى لكل الكادحين من العمال والفلاحين انة
تحالف لكل الماركسين الحقيقين حول العالم
وبداية لمشروع الثورة الاشتراكية المظفرة
المجد كل المجد للثوار