Monday, May 28, 2007

التوريث على الطريقة السورية


من يومين كنت اشاهد القنوات الفضائية وانا اقوم بجولة سريعة على الماشى وقعت فى قناة (سورية) اللى هى زى المصرية الفضائية عندنا كدة وصادفت بقى ان اليومين دول ميعاد الاستفتاء على بشار الاسد لفترة رئاسية جديدة وطبعا احنا عارفين لا فى استفتاء ولا حاجة اهو كلها مجرد شكليات علشان يغزوا بيها العين مش اكتر لزوم المنظر يعنى المشكلة انى لاقيت شوية مناظر بجد كانى بتفرج على فيلم كوميدى انا يعنى عارف ان جميع الطقم العربى بتاع الحكام صنف واحد لكن مكنتش اعرف ان طقم الاعلاميين الحكوميين كمان متشابهة بالطريقة دى زى فيلم
فيس اوف كدة ، واليكم المناظر العنب اللى انا شفتها صورة كبيرة لبشار فى وسط الشاشة مكتوب تحتها زعيم ووطن ! وطبعا الصور متخللها علم سوريةوبشار واقف وباصص بصة كدة لفوق تقولش بيشوف المستقبل يا اخواتى فكرتنى بالصورة بتاعة مبارك الشهيرة عارفينها الصورة بتاعة النظارة السودة والبدلة الكحلى وهو مشبك ايدة كدة وبيبص على حتة ارض مزروعة قال يعنى احنا عايشين فى رخاء وزهزهة ..ما علينا والمزيع بقى بيتكلم عن سيادة الرئيس بشار بتبجيل ورهبة زى ما يكون بيتكلم عن ربنا يا اخى دة ناقص يقول بعد تصريح بشار صدق الله العظيم ! بجد حاجة تفقع لا واسمع بقى شوية الاسطمبات دى اللى اكتشفت انها مش بتتغير من بلد لبلد : قادة دول العالم تثنى على قيادة الرئيس بشار لسوريا مؤكدا ان سوريا تلعب ..واخدين بالكم من تلعب دى ...تلعب دورا هاما فى الشرق الاوسط ولا شك ان حكمة الرئيس وجهودة الدائمة لحفظ الاستقرار فى الشرق الاوسط كان لها دور كبير فى تهدئة الاوضاع ...وان كثير من الدول الغربية قد تسائلت عن قيادة بشار بعد رحيل الاسد الرئيس الحكيم ايضا ...مش عارف اية موضوع الحكماء والدكاترة اللى عندنا دول ...المهم ..وقد قاد بشار البلاد بحكمة وروية نحو التقدم والازدهار والكنافة والمربى وكل الحلويات ..الخ ...مش واخدين بالكم ان الكلام دة مش غريب علينا !! بس يمكن اللهجة مختلفة مش اكتر وخدتوا بالكم من حتة حكمة الرئيس ودور الوطن الهام فى الشرق الاوسط ، المصيبة بقى ان جايبين احتفالات شعبية علشان ترشيح بشار والناس عمالة ترقص وتزقطط وتفرفش علشان بشار تنازل وتكرم وتعطف انة يرشح نفسة تانى فى الاستفتاء ..قال يعنى هو فى حد نازل قصادة طبعا الاستف دة كلة شبة الاستف بتاع حملة مبارك وجمال فى مصر لكن الصورة السورية اكثر فجاجة ووقاحة فعلى الاقل فى مصر فى معارضة حتى ولو بالاسم فى حد بيعترض فى دوشة وخلاص لكن التوريث يبقى عينى عينك كدة والدستور السورى يتقلب فى 24 ساعة علشان بشار يقفش..سورى يمسك سوريا ويبقى الحال كدة !! لاء والتلفيزيون بقى ساعة ونص بياكد على انا الشعب لازم ينزل مش بس يشارك دة لازم يقول نعم ودة قرار نهائى وخلى كلب يقول غير الكلام دة وعمالين يجيبوا لقائات لبشار مع رؤساء العالم على سبيل ان الرئيس مسمع فى العالم وكدة كام صورة مع الزعيم دة والرئيس الفلانى لكن اهم صورة جابوها بتاعة بشار ومبارك عبد الله...الثلاثى المرح بتاع المنطقة مبارك واقف بنضارتة وعبد الله شالح العباية على كتفة وبشار باصص بكل ثقة وحكمة ...ماهو برضة الرؤساء وقفتهم بتختلف عننا كبشر عاديين يعنى ..قلت يا نهار اسود معقولة مصر على اخر الزمن على عهد جيمى هتبقى كدة تلاقى جمال بيلوح للشعب والجماهيير عاملة افراح شعبية فى الصعيد والدلتا والقاهرة لجمال ...مين عارف اللى عيش فى عهد مبارك يا ما يشوف واللى يعيش لحد جمال يشوف اكتر ...بينى وبينكم دمى اتحرق روحت قلبت على ميلودى بلا علل ...قطيعة تاخدهم فى يوم واحد

8 comments:

احمد الجيزاوى said...

الخوف بعد التجربه السوريه والاردنيه والمغربيه انى يكون فى تجربه مصريه وجمال يمسك بدل حسنى عموما لو فضل الوضع زى ما هو هتبقه النتيجه انى الشعب المصرى هيتعمل فى كلالاوضاع

Mirage said...

نتيجة الانتخابات السورية ظهرت

97.2 %

على الاقل مش % 99.9

يعنى عندهم 2 % ديموقراطية

Anonymous said...

الرئيس السورى تربية ريسئنا الحالى وعرف ياخد خبرة ازى يقعد فى الحكم مدة طويلة

Anonymous said...

مش لازم يعنى يكون الشعب السورى مش fatmaعايز بشار الاسد ممكن يكون رئيس كويس ويكون موفر لهم حياة يحس انهم بنى ادمين مش سيب شعبه نايم فى شارع زى اهالى قلعة الكبش ولا سيبهم يتعلجو فى مستشفيات اقل حاجة تتقال عنها انها مقالب زبالة

moslem_fm said...

بس على الاقل لم يضحك على 70 مليون دفعة واحدة

زى المخضرمييين اللى عندنااااا


بس بردو فى فرق بين التوريث اللى وافق عليه الشعب
و التوريث اللى رفضو الشعب

sara said...

كان حقك تسمي البوست دا كوبي وبيست

وبعدين ليه معترض ان سوريا بتلعب ..ما سوريا بتلعب ومصر بتلعب وليبيا بتلعب ..عاتشي يعني ماهو الزعماء من حقهم يلعبوا في بلادهم زي ماهما عايزين

مش عجبك ان الدستور في سوريا ..اتغير في 24 ساعه

ربونا يستر


ان غدا لناظرة قريب


تحياتي

Anonymous said...

اللى يجى منة مفيش احسن منة واللى نعرفة احسن من اللى منعرفوش وهنيالك يا فاعل الخير وحسنة قليلة تمنع بلاوى كتيرة ومنقدم شىء بيداة يلقاة دة فى الجنة طبعا مش على الارض وسلام مربع يا جدع
تحيــــــــــــــــــــاتى
العضوة المشاغبة دائما وابدا
نـــهـــال عـــــزام

مصطفى محمود said...

رفاقى الاعزاء شكرا لردودكم:

الحقيقة ان تطبيق سيناريو التوريث فى سوريا يلقى ظلالا سوداء علينا فى مصر ..فما نراة من تصعيد اعلامى مستمر لجمال مبارك يؤذة شعور اى مصرى ابى يرفض هذا العار الذى سيلبسنا جميعا لو تم ما رادوة