Monday, May 21, 2007

سحقا لاسنانى


اصدقائى الاعزاء تحياتى ...اكتب اليكم وانا اغالب نفسى من هذا الالم القاتل فى اسنانى ، اللعنة لا اعرف لماذا فى كل امتحانات تيرم لازم سنانى تحصلها حاجة دى حاجة رخمة فعلا والمشكلة ان وجع السنان دة بيكون اشد حاجة لانة بيسمع فى الدماغ وبيجيب صداع و الواحد بيشعر بالالم لدرجة بتفقدة التركيز فما بالكم بقى بالعندة امتحانات !! وخاصة انى مفتحتش حاجة من اول السنة اوفففففففففف دى حاجة تقرف اوىىىىىى المهم انا بعد ما دروسى وجعتنى رحت للدكتورة ووكالعادة وهى بتكشف فاكرة نفسها فاتحة كبوت عربية ومسكة الة كدة عاملة زى

مفك طبى ! شبة الات التعذيب كدة وعاملة تخبط وترقع فى اسنانى يمين وشمال اية يا حاجة فية اية ..تقوم تقولى اصلى عايز اعرف الوجع فين ! يعنى هو انا اخرس ولا اية يعنى متسالينى قصر الكلام كتبتلى مضادات حيوية لما اتهديت ، المشكلة انى كل ما اروح عندها تكتفنى فى كرسى طويل كدة وتشتغل بنت الذين بمنشار كدة والالات الجهنمية بتاعتها انا مش فاهم هما دكاترة السنان دول بيعملو اية غير انهم يشرحوا فى الناس وعلشان اتغلب على شعور بالخوف من الالات وعلشان انسى الالم دة بتخيل نفسى مناضل مثلا ووقعت فى ايد الاعداء وهما بيعذبونى علشان اعترف ........هههههه بجد بعمل كدة علشان اتغلب على الالم بتاعى...يعنى مثلا واحد من المقاومة الفرنسية ووقعت فى ايد الجستابو اللى هو المخابرات الالمانية ايام هتلر وبيرقررونى علشان اقولهم مكان المقاومة فين وبحاول استحمل بقى ...فى حد فيكم بيعمل كدة لما بيروح للدكاترة ولا انا بس العبيط اللى بعمل كدة ؟

اسيبكم انا بقى علشان اخد الدوا سلام

7 comments:

يساري مصري said...

هههههههههههههههههه
مناضل مثلا ووقعت فى ايد الاعداء وهما بيعذبونى علشان اعترف ........هههههه بجد بعمل كدة علشان اتغلب على الالم بتاعى...يعنى مثلا واحد من المقاومة الفرنسية ووقعت فى ايد الجستابو اللى هو المخابرات الالمانية ايام هتلر وبيرقررونى علشان اقولهم مكان المقاومة فين وبحاول استحمل بقى

انا عملت نفس الحاجه قبل كده كانت اول مره اتبرع بالدم و بخاف من الابره
و شكل الابره فكرني ببوز الكلاشنكوف

قولت خش يامحارب دي ولا حاجه جنب وجع رصاصه في كتفك مثلاً

هههههه

الف سلامه عليك يا رفيق

kareem azmy said...

الف سلامة عليك يا درش
و الف سلامة على اسنانك

بس حلوة موضوع مناضل دي

عموما انا كل علاقتي بدكاترة الاسنان انتهت مع نهاية الطفولة الحمد لله مش عاوزين قر يعنى هههههههههههه

بس كل اللى افتكرة يعنى الحقنة اللى ف اللثة و انا اصلا بترعب من الحقن فطبيعي بكاء حاد قبل الحقنة و اوقات كان بيوصل انهم بيكتفوني و بكاء حاد عند خلع الضرس

المهم يا درش
انت مروحتش ليه للدكتور عبد الوهاب

علشان تبطل تاكل جلاس و تدوب ف قلوب الناس

و افلام ابيض و اسود
الا و النبي حد يعرف ايه الجلاس اللى كانوا بياكلوة ده ؟ يكونش جلاس يعنى ازاز ؟؟؟
هههههههههههههه

الف سلامة عليك يا درش

مصطفى محمود said...

يسارى مصر /

انت كمان بتناضل عند الدكاترة هههههه القلوب عند بعضها بقى . ربنا ما يوريك وجع السنان ابدا


كريم/

شكرا يا جميل والله انا بكتبلك وانا بجمع بالعافية بس كويس ان معندكش مشاكل الاسنان (من غير قر والله) هههه

وبتقولى كنت بتعيط عند الدكتور يا راجل دة انا مرة فى دكتور لما صرخت ادانى بالالم ابن ال*********
بس عموما انا حاطط دكاترة السنان فى اللستة اللى معايا هههههه مع انها مليانة على الاخر .بالليبرالين والاصلاحيين وغيرهم هههههههه

الله يسلمك يا حبى ...عن اذنك بقى علشان انام .تصبحوا على خيرا

احمد الجيزاوى said...

سلمتك يا بطل والله معرف انا لسه داخل النت النهرضه اصلى كنت مسافر ولسه راجع وعموما ربنا مجيب تعزيب ولا حاجه علشان تعزيب بيبقه مش خلع درس لا دة خلع رقبه وحجات تنيه عيب اقلها دلوقتى فكرنى لمه اشوفك اقلك عليه
بس عوزك تعرف انى الم السنان دة يدل
على انك بتاكل كلاس وبدوب فى قلوب الناس
الف سلامه يا درش
الجيزاوى

Anonymous said...

هاى مصطفى ازيك
انا مثلى قوى
انا قرات مقالتك وسلامتك اسنانك
تحياتى
ومزيد من العطاء مثلى قوى

مصطفى محمود said...

ربنا يخليك يا جيزاوى وصيتك المعارضة يا جيزاوى لو حصلى حاجة .


شكرا يا مثلى قوى ، الله يسلمك

sara said...

الله معك

فكرتني ان عندي ضرس واجعني بقاله فترة وانا مطنشاه جدا ..لأني بترعب من دكاترة السنان ومن حقن البنج اللي بتتاخد في السنان قبل خلع الضرس ..لا لا بجد حاله صعبه جدا ..احمد ربنا يا راجل انها جت علي قد مضادات حيويه ..انا اصلا السبب الوحيد اللي بيخليني اغسل اسناني من صغري اني ما اضطرش في يوم من الايام اني اروح لدكتور سنان

مدونتك جميله جدا

تحياتي