اليومين دول اخوكم بعد ما ساب الغد وربنا تاب علية بقيت اروح حزب الغد واقعد مع الناس اللى كانت زملاء العمل الحزبى بصفتى من الاشتراكيين ..بينى وبينكم الوضع غريب عليا الفترة دى .. هو شعور غريب شوية انك تدخل مكان عشت فية سنتين وعارف كل ركن فية وكل شخص هنا بس انت حاليا مش معاهم ومع تيار سياسى تانى .. لحد الان اصحابى مش متصورين انى بقيت اشتراكى بجد وفاكرنى يومين وهرجع (لعقلى) وانا كمان مستغرب انى بتكلم معاهم بصيغة تانية .. بس هى الدنيا كدة ولولا اختلاف الراى يا محترم ..على راى صلاح جاهين ... بصراحة تجربة الغد تركت فيا معالم عميقة فى نفسى اوى يمكن لانة اول حزب اشترك فية ويمكن علشان كان نافذتى الاولى فى عالم السياسة والفكر، لكن اجمل حاجة شوفتها فى الغد هى الناس بتاعتة وخصوصا اصحابى هناك يمكن من سنة وشوية لما كنا شباب جديد فى الحزب انا وبلال وطاهر وغيرهم وكنا بنتعلم مبادىء الليبرالية من قطب مكنتش متصور ابدا اننا ممكن نفترق ابدا واننا ممكن نبقى فى جبهتين ضد بعض او متعارضين مع بعض كليا زى دلوقت ، لكن اول مرة حسيت فيها بانى تركت الغد بجد لما كنت مع طاهر وقالى انتو عندكم (قصدة الاشتراكيين) بتقولو كذا ..
كنت اول مرة اسمع الكلمة دى عندكو؟ احنا وهما ! ساعتها عرفت ان السياسة فرقتنا بجد بس اتمنى ميكونش دة على المستوى الشخصى . يمكن انا مش اول واحد يغير فكرة او ينتمى لتيار سياسى مختلف بس الوضع الجديد عاملى لخبطة شوية فى حياتى
وكل ما اقعد مع بلال ولا طاهر بصفتى اشتراكى وهما غد وافتكر كنا بنتفق مع بعض زمان و ازاى كنا بنقعد القعدات دى وقد اية احنا فاهمين بعض بحس شعور غريب اوى وعلى طول انا وبلال بنتبادل الابتسمات خلال الندوات
وحتى لما جة يوم الطالب العالمى كنا نفس الصحبة ونفس الهمة لكن النفوس اتغيرت واختلفت كتييييييييييير
السنة الى فاتت كنت نازل غد ودلوقتى اشتراكى !! الحياة فعلا عجيبة
ومش عارف لية فى بالى فيلم سلام يا صاحبى وانا بكتب دلوقت
فى النهاية احب ارسل اهداء لكل الناس الحلوة اللى فى الغد ..
اكراما للعشرة الجميلة وللايام الخوالى
وسلام يا صحابى
Posts
12 comments:
طب أنت يا هتلر غيرت اتجاهك السياسى و حاسس بغربة ....... طب تقول إيه للناس اللى كانوا واقفين مع ايهاب ولا وائل و بيحاربوا بعض زى ما تكون حرب يوم القيامة
واحشنى يابنى بجد ... و على فكرة ... أنا أكتشفت أن أكتر حاجة بتفرق الناس و تبعدهم عن بعض و تكرههم ف بعض هى السياسة
ياريتنا كنا صحاب بعيد عن السياسة ... بس للأسف . مينفعش
صاحبك اللى مجبتش سيرته خالص فى كلامك :) و كنت حزعل أوى لو مكنتش بعتلى عشان آجيلك هنا
اهلا اهلا بدوى باشا
المدونة نورت ...والله انا متابع مدونتك وعجبانى.. وبصراحة مدعتش حد علشان دى حرية شخصية ومش عايزة مجاملة . انت والله واحشنى كمان زى كتييييييير من رفقة الغد زمااااااااان .. ايام اليبرالية البائدة . فعلا حاسس بغربة نسبية بس دة شعور مؤقت ورينا يسهل لكن انا حاليا سعيد مع رفاقى الجداد . على الاقل بيجمعنا تيار فكرى واحد واهداف مشتركة مش زى ال**** ولا بلاش خلينا مؤدبين ..
بخصوص انتخابات الغد انا كنت فرحان بيها جدا لكن للاسف ...فرقت الناس شوية مع ايهاب وبيكرهوا نوراة والعكس ...وفى الاول الكل يقولك عيب احنا بنختلف سياسيا بس ..لكن اللى بيحصل بجد انهم بيعادو بعض بجد . زى ما بيحصل حايلا مع فلان وعلان فى الغد .
ربنا يهدى الجميع
ونفسى نفسى نفسىىىىىىىىى نتجمع كلنا فى يوم واحد كدة كل رفقة زمان اللى فى الغد انت وطاهر وبلال ويوسف ماهر وكل كل الناس التانية ..ونتقابل بعيدا عن السياسية ونشوف اخبار بعض اية
وتحياتى للجمييييييييع
lenin
مبروك ياريس على المدونه الجديد ة
بس انا شايف ان المفروض هما اصحابك مش عارف ليه حاسس بالغربه اعتقدكل واحد ليه ميوله ولكن لا تؤثر على الصداقه
عزيزي لينين/
غريبة انك تبتعد عن أصدقاءك لمجرد تغيير رأيك،، أو اتجاهك..
مع إن تعدد وجهات النظر في شلة واحدة تثري المناقشات أكثر من اتفاقها، وزي ما انت قلت
لولا اختاف الرأي يامحترم..
تحياتي..
انا مقولتش انى سيبت اصحابى ..لكن كنت اقصد انى لما بشوفهم فى مؤتمر مثلا بنكون نازلين ضد بعض ..وهو دة اللى عاملى لخبطة
lenin
بيأثر الكلام ده فيا اوي
بس انا حاسس انك هتلف وهترجع تاني
اتمنى انك ما تسيبش اصحابك ابدا ........لان شكلك كده بيقول انك بتمووووووووت فيهم .يعنى رايي انك تحاول تعرض عليهم رؤيتك ومواطن الضعف فى موقفهم ......يمكن!
على فكرة أنا أكتشفت فعلا أن مفيش حاجة بتكره الناس فى بعض قد السياسة
حتى لو كانوا صحاب من قبلها أو أتصاحبوا عشان متفقين ف آرائهم السياسية .... السياسة بتخلى الناس تشيل من بعض و يخبوا على بعض ...... يمكن أكتر بكتير من البيزنس حتى
صدقنى يا لينين "هتلر سابقا" أنا بقول يارب أنك متعملش زى أكتر من واحد كنت بحبه و أول ما أرائنا تختلف ألاقى أن نظرتى ليه و نظرته ليا بتختلف
أسلوبك يا ولا حلو أوى زى عمك الليبلالى الكبير بدوى الأول عشر :)و إن شاء الله حعمل لك لينك عندى :)
متشكرين يا صاصا ربنا يخليك
ويا عماد صدقنى مش معقولة ارجع لليبرالية تانى ..مش معقولة اوافق على سرقة الناس واستغلالهم تانى
الرفيق بدوى ..يعنى حضرتك بتزورنا فى المدونة ..وكمان هتنشر لينك للمدونة ..والله دة كتير يا باشا ...
بص يا يبنى مع انك غد ..لكن برضة ليك دقات جدعنة ..ومعلش ااحنا بنتكلم
لينين
فعلا حصل معايا نفس الموقف ..
الأول انا كنت أشتراكى .. قبل مغير ..
فعلا كل ما الواحد بيكبر كل ميحس بنضج فكرى ..
المهم يكون عارف هو صح ولا غلط ..
اهلا بيك يا محمد وبخطاب كمان نورتونا بس انا مش عارف انتوا اتنين ولا اية ظروفكم؟
المهم مش عارف مين فيكم كان اشتراكى بس اكيد مش خطاب طبعا تقريبا محمد
طبعا من حق كل واحد فينا يعدل فكرة بس اهم حاجة اننا نخضع تفكيرنا دائما للمراجعة والنقد ..فقط اهم شىء ان نشعر باننا نمتلك الحقيقة المطلقة
المراجعة ثم النقد ثم اعمال العقل
لا بديل عن هذة الخطوات لتطوير الفكر
لينين
عفوا اقصد ان لا نشعر بامتلاك الحقيقة المطلقة
Post a Comment