Thursday, April 10, 2008

" طلاب حقى " يتضامنون مع اهالى المحلة

اكثر موقف يدعوا الى التوقف والمراجعة بعد احداث المحلة ....ليس موقف الحزب الوطنى ..وليس موقف الاعلام الحكومى ...وليس موقف الاحزاب الورقية ولكنة موقف الاخوان المسلمين من اضراب يوم 6 ابريل ومن نضال المحلة عموما ! لن اطيل عليكم ولكنى سأذكر فقط ما حدث داخل جامعة القاهرة بدون اى افتراء على الاخوان ...صباح يوم الاحد ورغم التواجد الامنى المرعب وملاحقتة لطلاب حقى وللطلاب الاشتراكيين ..كان بعض فتيات وشباب الاخوان فى الصباح يعلقون معرضا فى كلية علوم فى امان وسلام تام!!
...وللوهلة الاولى حسبتة معرضا عن جوعى وفقراء المحلة ولكن......

كل يعمل فى مكانة من اجل غزة ...هذا صحيح.... ولكن ماذا فعل الاخوان فى مكانهم من اجل قتلى المحلة المحاصرة؟

اما طلاب حركة حقى فقد اقاموا يوم 9 ابريل معرضا تضامنيا مع عمال المحلة ..وعرضوا صور القتلى والمصابين على يد جنود الامن المركزى وصور حصار المدينة الباسلة ...ووزعوا بيان يؤيدون فية نضال عمال المحلة مؤكدين على ان مطالب اهالى المحلة هى مطالب كل المصريين الفقراء ، وان المطلب الاهم بين الطلاب الان هو تفعيل مجانية التعليم والوقوف ضد مشاريع خصخصة التعليم التى تعتزم الحكومة ممارستها قريبا مما سيؤدى باكثر من نصف الجامعة الى الشارع بدون ان يحصلوا على تعليم جامعى وكل جريمتهم انهم فقراء!

وطبعا فى ختام فعاليات حركة حقى هذا التيرم كان لابد ان يراقب الامن المعرض ...... ويجب ان نسجل انهم يحرصون على مشاركتنا فى كل الفعاليات!!1
بينما يوم 9 ابريل ...فى نفس اليوم ولكن عند جامع تجارة كان طلاب الاخوان المسلمين يقيمون حفلا للتخرج للفرقة الرابعة .....وانا لست ضد حفلة التخرج..... ولكن ماذا عن المحلة ؟ عن العمال ؟ عن الفقر والجوع والاسعار ؟ عن القتلى والمصابين ؟ . اذا كانت جماعة الاخوان المسلمين جماعة تخدم فقط اعضائها من طلاب وعمال ومحامين ومهندسين فلماذا لا تعلن ذلك ! اما اذا كانت تصدر نفسها على انها جماعة تسعى للتغير والاصلاح للمصريين فمن حق عمال المحلة بكل صراحة ووضوح ..ان يسألو الجماعة ماهو موقفهم بالضبط من الحركة العمالية ومن سياسات الخصخصة والسوق؟ وماذا فعل الاخوان " التنظيم المليونى" لدعمهم؟، لست من هواة انتقاد الاخوان والتشهير بهم ..وانا حتى الان متضامن معهم ضد المحاكمات العسكرية ..ولكن لا يمكننى اغفال موقفهم المتخاذل من نضال عمال المحلة الشرفاء ولا يجب لاى حسابات او مجاملات سياسية ان نتغاضى عن مهادنة الاخوان للنظام على حساب الجماهيير...فاى تراجع عن نقدهم فى هذا الموقف يعتبر اشتراك ضمنى فى غض البصر عن سحق الحركة العمالية بابشع الصور لصالح تطبيق سياسات السوق والخصخصة.

10 comments:

Anonymous said...

بمنتهى البساطه لو نظرنا للاخوان بغير نظره اولياء الله الصالحين" اللذين لا يأتيهم الباطل من بين ايديهم ولا من خلفهم" هنعرف حقيقتهم اللى وضحتهالنا بكلامك النارى بلا تعصب وصورك المعبره........... يا احلى لينين فى افريقيا(((((((((عثمان))))))))))))

ملاح في الفضاء said...

صنعت فيديو عن ثورة المحله
بإمكانيات و مواهب متواضعه لكن أتمنى أن يعجبكم
http://freespacecraft.blogspot.com/2008/04/6-2008.html

Anonymous said...

لا لحسنى مبارك على كل عملة ورقية فيكى يامصر- هدية شعب مصر لمبارك

تخيل كل عملة فى مصر مكتوب عليها لا لمبارك

الشعب خايف وديه وسيلة سلمية تماما عشان الناس تشجع بعض !!

عاوزين ديه تكون هدية شعب مصر لمبارك
عاوزين العملة ديه تكون فى ايد مبارك يوم 4 مايو

عاوزين اى حد يمسك عملة مكتوب عليها لا لمبارك يبتدى يفكر
الشخص ده معارض او يعرف حد معارض !!

لما البواب يخدها من واحد راكب عربية
لما المكانيكى ياخدها من بيه

واحده واحده الشعب هايتجرأ

اكتبها بخط واضح وكبير
اضراب 4 مايو - لا مبارك

انشرها وسط صحابك

هدية شعب مصر لمبارك فى عيد ميلاده

Anonymous said...

و ليه متكونش يسقط حسنى مبارك بدلا من لا لمبارك

مصطفى محمود said...

عثمان /

اهلا يا عثمان .... كلامك رائع .

ملامح فى الفضاء /

سوف اشاهدة قريبا يا زميل ..نورت المدونة .

الشباب الجميل اللى علق /

اية الافكار الجميلة دى .... انا متهيألى احسن واحدة تنظيم اضراب يوم عيد العمال الجاى .

تحياتى .

ahmed borham said...

انت نسيت حاجة
الاخوان لما بيتم اعتقال اى حد منهم
بيعملوا مظاهرات وفى كل مكان تلاقيهم
بيتكلموا عن المعتقالين والمطالبة بالافراج عنهم
ومظاهرات فى كل مكان

طيب لما تم اعتقال اسراء ورفاقها
الاخوان عملوا اية
ودة دليل على انهم بيشتغلوا
لحسابهم الخاص
يعنى هما عايزين كل الناس يبقوا اخوان وبس

شكرا ليك وياريت لو فى صور ثانية تنزلها

Anonymous said...

اقتراح لا لمبارك

علي كل عملة ورقية اقتراح جامد


عملت له جروب علي الفيس بوك

الرابط أهه


http://www.facebook.com/group.php?gid=11068307380

الفاتح اليعقوبي said...

السلام عليكم
ازيك يامصطفي عامل ايه ربنا يكرمك يارب؟
بص ياجميل ربنا يكرمكم علي المعرض طبعا اللي انتم عملتوه بس سؤال بيلح في راسي جدا ليه عملتوه في الوقت ده بالذات رغم انكم عارفين اننا محددين معاد الحفلة بتاعتنا من فترة كبيرة ليه اليوم بتاع حفلتنا بالذات

حاجة تانية
وده اللي خلانا مع الاخوان المسلمين ان الاخوان منظمين جدا والحمد لله
معاد حفلتنا ده بناخده من اول التيرم في خطتنا وعملنا ولا تراجع في ميعاده حتي لو اعتقلوا مكتب الارشاد كله
ودليل علي ذلك ان حفلة كلية طب يوم 15/4يعني يوم المحاكمات العسكرية بس خلاص الميعاد اتاخد يبقي العملية انتهت والعمل لازم يتنفذ لانه بيخدم علي نشر فكرنا وتوصيل اهدافنا والعبرة بيننا وبين النظام ان من يستحمل اكثر يكمل للنهاية


حاجة كمان
ياعم مصطفي الناس اللي ليل نهار ترزع في الاخوان وتشتم فيهم معلش عدد المعتقلين الاخوان اكبر من عدد قوي المعارضة في مصر كلها
الاخوان عندما تضامنوا مع القضاة وتم اعتقال يومها 1500من الاخوان وكان فيهم قيادات للجماعة
الاخوان لسه قريبا قبل الاضراب مخرجين 5مسيرات عن الغلاء في البلد في خمس محافظات وتم سحل مسيرة للاخوات في دمنهور والغربية وضربت النساء لم اجدك انت او غيرك تعلق علي هذا الموقف مش عارف انت خدت خبر بيهم ولا اساسا

حاجة كمان
الفرق بين الاخوان وبين قوي المعارضة كلها التي تمزقت بين جعجعة فاضية وعدم تنظيم وعشوائية وعمالة لامن الدولة
اننا الحمد لله منظمون للغاية واذا اردت معرفة الفرق بين الاخوان وغيرهم فلتنظر الي مسيرتكم ومسيرتنا في الجامعة تعرف معني كلمة العشوائية
لما واحد منكم داخل يتكلم فالتاني يقاطعه ولا لما واحد بيتكلم يقوم يدخل عليه واحد فيهتف ويقطع كلامه
كلكم عايزين تتكلموا وكلكم عايزين تظهروا الا من رحم الله منكم
يامصطفي لم نشارك في الاضراب كجماعة لان موقف مثل الاضراب هذا سيكلف البلد الكثير وسيكلفنا ايضا الكثير ولا نبدي مصالحنا الشخصيةعلي مصلحةالبلد ابدا والله يعلم مانقول فلا تزال السجون تمتلئ يوم بعد الاخر بمعتقلين الاخوان ولكننا ذا قررنا الدخول الي عمل يجب دراسة الامر جيدا ولا يتم الامر بعشوائية ولك ان تتخيل لو ان الاخوان دخلوا وشاركوا كجماعة في الاضراب لكانت البستهم الحكومة اعمال التخريب في المحلة ولكن المشاركة في الاضراب تمت بشكل فردي وعلي فكرة المظاهرة لما كانت في الجامعة شارك فيها طلبة من الاخوان ويمكن انا وشهيد شاركنا فيها واغلب اخوانا في الجامعة فضلوا في بيوتهم مضربين وتكلمت مع الطلبة في موضوع الاضراب في المدرجات وعملت مايميليه علي ضميري وواجبي

امر اخير يامصطفي انتم فشلتم في التواصل مع الناس الا في المظاهرات فقط اما غير المظاهرات فلا اري لكم تفاعل في الجامعة وهذا ليس باسلوب اناس تريد ان تغيير في الواقع المرير الذي تعيشه بلادنا ومشكلتكم انكم شغلتم انفسكم بمعارضة الاخوان والنظام رغم ان الاخوان اكثر فئة في الشعب تتعرض للاضطهاد فشتتم مجهودكم وفكركم وفضيتم الي جدال بيزنطي عقيم لا طائل وتناسيتم التفاعل مع الناس ركزوا جهودكم ونظموا صفوفكم وتجردوا من طلب التقدم والقيادة بينكم وبين بعض ولكن عامة هذا لايمنع احترامي ليك يامصطفي وبقول الكلام ده بجد والله في كام شخصية فيكم بحترمهم جدا حتي لو رزعوا وخبطوا في اللي خلفوا الاخوان طالما ان نقاشنا لايحمل كرها لبعضنا البعض
وعايز ابقي اقابلك في الجامعة نرغي مع بعض شوية
ماش ياصاحبي والله عليك متزعلش مني ان كان في تعليقي كلام جارح
والسلام

مصطفى محمود said...

الفاتح اليعقوبى /

يا اهلا بيك ... بخصوص يوم 9 ابريل ... الميعاد جة كدة وبدون اى مؤامرة يا عزيزى ..ببساطة انت تتحدث عن جماعة الاخوان المسلمين وفعالياتهم ..بينما نحن فى حركة حقى عشرات .. وبعد يوم مظاهرة 6 ابريل ..يوم 7و 8 بنتكلم مع الناس وبنحضر للمعرض اللى مكانش ينفع ناخرة يوم واحد علشان يوم الخميس مالوش لازمة وكان الوضع فى المحلة ملتهب زى مانت فاهم . اما كون دة موافق لميعاد حفلتكم ..فدى مش مشكلتى وبعدين انت بتقول اننا كنا عايزين نبوظ اليوم بتاعكم !! ياراجل احنا كام واحد فى حقى ؟ وانتوا كام؟! بعدين احنا وقفنا بالظبط ساعة ونص عند الجوكر وانتوا عاملين حفلة ديجىىىىىىىىىىىىىى... نبوظ اليوم ازاى بس!! عموما من حقكم تنظيم حفلة تخرج والله انا مش ضدها بس انا بقول من يوم 6 :9 ابريل عملتوا اية للمحلة ؟ يعنى هل يعقل لمدة اربع ايام والناس بتموت وتضرب فى المحلة اعمل حفلة تخرج وبسسسس...مش المفروض اتكلم عن اللى حصل دة باى شكل ؟.

2- والله انا معرفش فعلا عن مظاهرات الغلاء دى سوى فى المحلة وميدان الجيزة، واكيد انا كنت هاييد الاخوان فى دة ... بعدين مع احترامى ليك مش من حق الاخوان معايرة الناس كل شوية بعدد المعتقلين الاخوان وعدد التنظيم وقوتة الخ الخ ... انتم اكبر تنظيم سياسى وضريبة دة اكيد مرتفعة بس اهوة كل واحد بيعمل اللى علية .

3- انا حضرتك مش من محبى التشهير بالاخوان واظنك عارف دة ...لكن من حقى انتقدهم ...واللى حصل منهم يوم 6 ابريل مخلى كل مصر محتقنة منهم مش انا بس واكيد انت عارف دة .

4- عيب اوى انى اسمع من طلاب الاخوان كتبرير عن عدم مشاركتهم يوم 6 ابريل ..ان محدش قالنا !!

بجد مش عايز ارد . لان عيب على تاريخ وتنظيم الاخوان كلمة زى دى .

5- والله عرفنا انكم منظمين بس انتم منظمين لدرجة اوفررررررر.... انا مش عايز اخش فى كلام معايرة لان احنا الاتنين انضج من دة ..بس انا عايز ااقولك حاجة ... الناس اللى هتفت معانا دى ..دى حاجة تشرفنا يا زميل ببساة لاننا مش بنعتبر اى يوم تضامنى بتاعنا ولكن بتاع الطلبة وبنسمح للطلبة انهم يتظاهروا معانا بكل حرية ... لكن لو تفتكر مظاهرة غزة لما بس فكرنا نشتغل معاكم ...الخوان ماشيين 3 ...3 ورا بعض ... وقافلين على نفسكم المظاهرة !! طب انتوا عاملنا لنفسكم ؟ ولا علشان الناس تشارك معاكم ... وبعدين كان فى بنات كتير فى المظاهرة جم يشاركوا قلتلهم مفيش اختلاط!!..وكان البنات دى جاية تهزر مش جاية تتضامن مع حصار غزة .

6- لو انت شايف اننا فاشلين ..طب بتطلبوا تنسقوا معانا لية ؟

وغير مظاهرة غزة و6 ابريل .. احنا طول الاسبوع فى الجامعة وانت عارف دة وحرام تقارن نشاطتنا اللى على قد امكانياتنا ...بامكانيات جماعة الاخوان المسلمين ...دة انتوا عندكم 88 كرسى فى مجلس الشعب وشركاتكم مغرقة مصر .

* اخيرا *
انا لا بكرهك ولا حتى بكرة الاخوان ...انا بس زى ما بتضامن معاهم كتير ..من حقى انتقدهم فى مواقف معينة ... واظن دة شىء عادى جدا ...وبعيدا عن التنظيمات ياريس وعن اسم الجماعة ...وعن الجو الاعلامى دة ..وعن الدفاع عن موقف الاخوان ... احسبها كشاب مصرى كدة مع نفسك ... وانا راضى ضميرك .

تحياتى

tolaab mokawma said...

انا معاك يا مصطفى ف كلامك ...اى تخاذل من الاخوان ما ينفعش يكون فى مجاملة و كلام فاضى ...اى تخاذل من الاخوان يجب فضحه بكل وضوح و صراحة