Tuesday, September 18, 2007

رمضان كريم


معلش يا جماعة اتاخرت عليكم بس انتوا عارفين بقى من اول رمضان وكل يوم بنفطر عن قرايبنا وبنزور ناس تانية ومفيش وقت غير للهضم طبعا . طبعا كل سنة وانتوا طيبين برمضان اللى جاى مع المدارس وماشاء الله الاسعار زى الفل لكن نرجع ونقول رمضان كريم !
من اول رمضان وزى ما توقعت الرجل خفت على النت والبلوجرز ياما بيفطروا يا ما بيحضروا للفطار يا ما بيتسحروا المهم محدش فاضى ، بس السنة دى على غير العادة ناس كتير متابعتش المسلسلات والبرامج الرمضانية ماهو طبعا الواحد لازم يخاف على ضغطة برضة واحنا فى ايام مفترجة زى دى.. بس اخوكم بيتابع مسلسل واحد بس وهو طبعا الملك فاروق بصراحة مسلسل روعة مش علشان بيتكلم عن الملك فاروق بس لكن علشان البطل تيم حسن والمخرج حاتم على والكاست السورى الرائع هما الى شايلين المسلسل ، فى ناس كتير بتشوف تيم حسن لاول مرة لكن انا متابعة من زمان من ايام ملوك الطوائف هو وجمال سليمان وسولاف فواخرجى وكمان مسلسل صلاح الدين ... انا تقريبا بطلت اشوف مسلسلات مصرية حقيرة علشان مرارتى وبقيت متابع الدراما السورية المتفوقة من 3 سنين كدة واكيد اى حد متابع الاتنين هيعرف لية خد عندك مسلسل الامام الشافعى على القناة الاولى والى بيقوم ببطولتة يمان البحر درويش من اول حلقة تقرف تكمل المسلسل ديكورات معفنة شفتها فى تلاتين مسلسل ممثلين درجة 175 ملابس واكسسوارات مصدية وغير متناسبة مع الزمن حوار ضعيف وتمثيل زبالة وهى هى الباروكات المعفنة اللى ممكن تشمها وانت قاعد بتتفرج وكواليتى الصورة بقى يا سيدى اكنك بتتفرج على القناة السابعة فى برنامج حشرات المنزل سنة 70 اول ما عملوا الالوان كدة وصورة صفرة ..باختصار هتخلص الحلقة وانت عندك حموضة ... حد فيكم بقى يشوف اى حلقة من المل فاروق ..انتاج ضخم وراقى من المبى سى ....بطل متفوق وهو تيم حسن سحق جميع الممثلين المصريين واهلتة موهبتة العالية لتخطى جميع المصريين ومخرج مبدع حاتم على وديكورات ونقاء صورة مش معقولة وحبكة درامية ممتازة بجد مسلسل رائع وتيم حيسن متالق فية جدا كنت سعيد اوى وانا بشوفهم بيدوا درس للدراما المصرية البليدة المتخلفة ومواضيعها القديمة الزبالة ...تيم حسن و جمال سليمان و سولاف ابطال الدراما العربية يتقدمون ويسحقون كل المنافسين الترسو المصريين والمخرجين المصريين الكفتجية . حد هيقولى انت مالك متحامل كدة لية على الدراما المصرية هقولكم لانى بقالى سنين متحاصر بمسلسلات متخلفة وتيمات مكررة وتجيب التخلف العقلى وتسبب تهيج فى الكبد من فرط الابتذال والكروتة والاونطة والاستسهال .. من حقى افرح لما اشوفهم بيتذلوا قصاد عمالقة الفن الحقيقى ابطال الدراما السورية .
مش تقولى نادية الجندى والهام شاهين وبرنامج الشقة ..وبرنامج مين فينا !! من فينا اية ؟!
يا راجل بلا وجع بطن
اسف يا جماعة اصلى مخنوق بجد منهم ومصدقت الاقى حاجة عدلها اتفرج عليها واستمتع بيها .
اة صحيح لقيت امبارح ايميل جايلى فى تقريبا حد من التيار الاسلامى فى فلسطين بيقول ان صلاة الشيوعيين باطلة فى رمضان !! ياريت يا جماعة بلاش الكلام دة لان موضوع الدين دة بين كل انسان وربنا ومش من حق حد انة يحكم على التانين فية وياريت محدش يخوض فى الموضوع دة .
اسف على الرغى دة
وكل عام وانتوا كلكم بخير
ورمضان كريم

3 comments:

Monzer said...

أولا كل سنة وانت طيب
بالنسبة للمسلسات بجد حاجة تخنق جدا
مسلسلات المصرية خنيقة قوى
بس مافيش وقت الواحد يتفرج على الملك فاروق
بس انت شوقتنى انى أتفرج عليه
بس على سبيل المناغشة الى دايما بنا
اشمعنى المرة ده مافيش تعصب للقومية المصرية والحوارات ده
ولا علشان مش خلايجة سوريين ـ وش بينظر بخبث ـ هههههههههه

بس عندك حق والله
أما مسالة الميل الىجه ان صلاة الشيوعيين باطلة
فلا هو مفتى ولا انت مفتى ولا انا مفتى
بس انت صلى يا عم ، هو انا عارف ان ربنا ممكن يتقبل منى انا وأنا مش شيوعى
القبول دعه بالذات بتاع ربنا
مش بتاعنا خالص ، احنا نصلى وندعى انه يتقبل منا صالح الأعمال
وبعد كده كل حاجة برحمته

Monzer said...

آه صحيح كنت هانسى
عاوزك تشوف
صورة عاملها يسارى مصرى
اكدي تعرفه تشى جيبارا، اعمل سيرش على جوجل على كلمة يسارى مصرى
حاطط حته صورة بيهنى فيها لرمضان
شوفها بس
وابقى قولى شوفتها وشوف تعليقى عليها
سلام يا معلم
وهنتقابل صحيح ع البورصة يوم الأربعاء القريب ده
السعة عشرة ونص
ياريت تيجيى
ماشى
خد الميل بتاعى
ejymejy@yahoo.com
هاستناك ماشى
وابقى راسلنى عليه
سلام يا اخ ههههههههه

مصطفى محمود said...

وانت طيب يا ابو منذر

حبيبى انا لا اعترف باى قومية ... الراسمالين ملة واحدة واللبروليتارايا كذلك .


بعدين انا فعلا بحب اهل الشام عن الخليجين عادى يعنى

اوك اشوفك يوم الاربع يا معلم

تحياتى