Monday, September 10, 2007

من غزل المحلة الى ميدان الجيزة ...مظاهرات الغلاء مستمرة


نظم موظفين مديرية الضرائب العقارية فى مجمع الجيزة امس وقفة احتجاجية تواصلت منذ الساعة الواحدة ظهرا الى حوالى الساعة 8 مساء احتجاجا على تدنى الرواتب وغلاء الاسعار الفاحش خاصة مع تزامن بداية العام الدراسى مع رمضان الامر الذى ارهق ميزانية الموظفين هذا ان وجدت لهم ميزانية ! فخلال حديثى مع بعض الموظفين اكدوا لى ان المرتباب لا تتجاوز ال350 جنية وهوراتب لا يكفى لسد رمق انسان واحد فما بالكم باب يعول اسرة وطالب الموظفين برفع راتبهم الى مستوى زملائهم فى وزارة المالية او بضم مديرية الضرائب العقارية لوزارة المالية ليحصول على نفس مستوى رواتب العاملين بالوزاة فى نفس تخصصهم



وذكر لى احد الموظفين ان تدنى الراتب يجعلة هو واخرين للبحثن عن اى عمل اخر بعد الظهر او فلنقل بعد العصر اذا توخينا الدقة ! حتى ولو بواب او قهوجى اى شىء المهم ان نستمر فى الحياة مع ملاحظة ان الموظفين الاخرين اشتركوا مع موظفين الضرائب العقارية فى اعتصامهم وعندما قلت لة ولكن الم يخف الموظفون من امن الدولة والمباحث قالى :

هيسخطوك يا قرد !


تواجد عساكر الامن المركزى لم يزد الموظفين الا اصرارا ا


الجوع كافر


ببراعة شديدة نظم الموظفين انفسهم ووحدوا صفهم وهتافهم ضد حكومة فاسدة



ضغط الظروف الاقتصادية لم يعد يسمح لاحد برفاهية غض البصر والسكوت

قوات الارهاب الحكومية تستعد للتحاور البناء مع ابنائها !



لم يفتقد الحدث التواجد النسائى ..... ياجاى على قوتى يجاى على موتى





فى حديث مع احد الموظفات قالت: انة يوجد فى القسم التى تعمل بة موظفة 20 سنة خدمة (على حد تعبيرها) وراتبها لا يتجاوز 250 جنية! وان زوجها يعمل منذ 12 عاما وراتبة لم يتجاوز ال 170 جنية !

يذكر ان الجماهير قد انتفضت فى غزل المحلة منذ ايام قليلة بسب ارتفاع الاسعار وتدنى الاجور ايضا ،
http://yalhwy.maktoobblog.com/ : للتفاصيل
شعلة النضال تنتقل من القطاعات العمالية الى المهنيين والموظفين فى كل قطاع بشكل عفوى وقوى ، انتفاضات الكادحين اصبحت تؤرق الحكومة بقدر ما يؤرقهم الجوع ، البؤس والشقاء يتمردان ضد نظام فاسد متعفن ....الجماهير لم تعد تحتمل وعود المسؤلين ومصر باتت مشرفة على انفجار اجتماعى صاخب.


11 comments:

مـحـمـد مـفـيـد said...

تغطيه مميزه
كعادتك

محمد مارو said...

اجمل ما فى الموضوع اننا اتعلمنا ثقافه التظاهر بأدب بعيد عن التكسير و كمان التظاهر بنظام
شكرا لك

kareem said...

اعتقد ان مصر قادمة على ثورة مشابهة لصورة الجياع زمان

بجد الحالة بقت وحشة قوي
و العالم دي مبقاش عندها دم و لا حاسة بالفقر و الغلابة .. ربنا يحفظنا جميعا

بجد تغطيتك رائعة يا جميل

كريم عزمي

EGYPT EYES said...

أحب انا التغطيه الميدانيه للأحداث
كالعاده الله ينور عليك يامصطفي
تصدق يادرش أنا بستني مواضيع وبحب اشوف الصور اللي بتجبهالنا يعني أنت بقيت مصدر من مصادر معلوماتي وعلى الرغم أني قريت الموضوع دا في جريدة الدستور بس بصراحه الموضوع أما يكون باللون الأحمر بيبقى أجمل D:
تحيه ثوريه

فى القلب said...

أنته عارف أشد الثورات عنف
هى ثوره الجياع
وبما أننا بقينا كلنا جياع
أنا حاسه المركب بتقلب


كل سنه و أنت طيب و رمضان كريم

احمد العزيزي said...

انا موظف بالضرائب العقارية يا اخواني نحن نعامل كأننا اولاد البطة السوداء وزملاؤنا في الضرائب العامة او المبيعات او الجمارك هم ابناء البطة البيضاء مرتبات مدير مأمورية لا تساوي مرتب اصغر عامل بمأمورية ضرائب عامة
لماذا هذا الظلم ونحن ابناء وزارة واحدة
وفي النهاية اسماعيل بيه عبدالرسول يصرح وهو في مكتبه بأن المرتبات 1500 جنيه
اه ماهو بيتكلم عن نفسه
الاغرب من ذلك ان العاملون في المصلحة يتقاضون مرتبات وزارة المالية وهي بالالاف وكذلك المديرون العموم بالمحافظات
اما صغار الموظفين بالمديريات بالمحافظات فياكلو طوب فليس لهم حول ولا قوة
يذكر اننا كنا تابعين للوزارة عام 1974 ولكن حل علينا غضب الوزير لسبب لا يعلمه الا الله
نحن ناقمون على رئيس المصلحة وعلى وزير المالية
جاتهم الف داهية
مات كل ولائنا لهذه المهنة
ولهذا الوطن
ارجو من محرر المدونة ان يساعدني في معرفة رقم تليفون محمد عويطة للتنسيق معه لعمل مظاهرة مشابهة بمديرية ضرائب المنيا العقارية
واشكر تضامنكم معنا
احمد العزيزي

احمد العزيزي said...

بعد اذنك سأنقل الموضوع الى مدونتي مع ذكر المصدر طبعا

مصطفى محمود said...

محمد مفيد :


شكرا يا محمد ربنا يخليك


مارو :

ثقافة التظاهر انتشرت فعلا فى المجتمع المصرى بس الاهم هو الخطوة الجاية .
انا شوفت صورك فى المحلة اية يا واد الشغل دى الله ينور


كريم :

عامل اية يا ولا كل سنة وانت طيب / وهما يحسوا بيهم لية ؟ ماهما مستفيدين من الوضع دة اصلا .


عيون مصر :

مشكوووووور يا زميل والله انا كمان بحب التغطيات الحمرة ههههههه.. طبعا الدستور جريدة محترمة بس الصعب الواحد يكون محايد فى نقل اخبار زى كدة والحقيقة مفيش حياد ياما مع الجماهير ياما مع النظام مفيش وسط .


فى القلب:


مش بس الجياع ثوراتهم اشد لكن وهما مين غيرهم كان ثار قبل كدة !!

كل سنة وانتى طيبة


احمد العزيزى :

اهلا بحضرتك وانا سعيد جدا بتفاعلك مع الموضوع وسعيد اكتر بمبادرتك دى وانا تحت امرك فى اى حاجة
ايميلى :

imposipolman0000@yahoo.com



وكل سنة وانتوا طيبين جميعا .

NoorGay said...

عرض رائع
واسلوب متميز

EmY said...

يارييت التظاهر يجيب نتيجه و حد يسمعهم
مافيش احساس بالغلابه

مصطفى محمود said...

نور:

اهلا بيك يا نور كل سنة وانت طيب


ايمى :

لازم نساعدهم علشان يساعدونا فى اوقات تانية .