Tuesday, November 6, 2007

الاضراب




باسم الإله الشعب
رب المضربين
الصايم
المحروم على مر السنين
يا منشدين الحي
حيوا حينا
واحنا هنا
ع العهد دايما مخلصين
محلا القصايد
في الشدايد .. والغنا
محلا الكلام الحب
أوقات الشقا
احنا اللي تهنا ع الطريق
من بعضنا
متفرقين
والسجن هوا الملتقي !
آه يا رفاقه
من متاهات الطريق
لما الليالي
بيتخنق فيها القمر
يمشي الصديق
في الضلمه
يخبط في الصديق
والسكه بنت الخطوتين
تاخد سنه !

إحنا النهارده فين
وكام
وبكره كام
وبعده فين ؟
في كل يوم بنزور مكان
وكل يوم
بنزيد عدد
وكل يوم
نفتح بيبان
وكل يوم
بنزيل سدود
وكل يوم
يطلع بنا
وكل يوم
ينزل هدد
وكل يوم
نحبل غنا
وكل يوم
نولد مدد
احنا كده لازم نكون
جوا السجون
برا السجون
محلا القصايد
في الشدايد والغنا
محلا العيدان الخضر
في الربع الخراب
احنا اللي تهنا ع الطريق
من بعضنا
متجمعين
بنخط صفحه في الكتاب
ملعونه قامه تنحني بالقهر
من حاكم .. وخان
ملعونه كلمه تنتني في الحلق
تهرب م اللسان
ملعونه ساعه تنحسب م العمر
يطويها الخنوع
ملعونه لقمه مغمسه بالذل
ملعون الجبان
آه يا رفاقه
ياللي علمتوا الصلابه للحجر
بانده لكم
وسط الكآبه
والرتابه .. والضجر

يا مقربين الفجر
نوره ومطلعه
مدوا المسامع
في المجامع
واسمعوا
صرخة مغني الحي من جوف العدم
اتجمعوا

اتجمعوا

اتجمعوا






نقلا عن يسارى مصرى

5 comments:

يساري مصري said...

عمك احمد كلامه يحرك الحجر ياجدع
انا بعشق القصيده دي
عايزك ياريت تيجي اونلاين

kareem said...

جميلة قوي

كلمات مين ؟؟

عمنا احمد فؤاد نجم؟؟

تحياتي

kaed said...

كلام يحرك الحجر
بس إنت تقول لمين ومين يسمع

السيد شبل said...

كلام جميل ومعبر........ واتمنى ان مصر تقوم لكن بالشعب اللى موجود دلوقتى صعب
اتمنى ان يكون بيننا اتصال
bela-esm.blogspot

brastos said...

ابو النجوم رائع في القصيدة .. وانت مع يساري مصري رائعين في اختياركم لها ..