Tuesday, October 23, 2007

على باب سفارة كندا

انا جبتلكم قصيدة لعلى سلامة يا رب تعجبكم


على باب سفاره كندا
لمحت أبليس وف أيده
أستماره
بقوله على فين
قالى بص
يا هجره يا أعاره
يا عم كفرت زهقت
ألاقيش معاك سيجاره
أنا أنتهيت خلاص
لا نافع وسواس ولاخناس
ولا ليا عيش وسطالناس
دى عالم مجرمين
عندكوا فائض ف الفساد
فى كل البلاد
ومش محتاجين شياطين
مليش عيش ف البلد دى
بقالى سنين عاطل
وأنتوا بتعرفوا تقلبوا الحق باطل
وتسلكوا القاتل
وتمشوا ف جنازه المقتول
ومفيش مشاكل
يا عم ده أنا بقيت أوسوس
بالمقلوب
وأقول للحرامى كفايه بقىتـــوب
أنت هتعمل كل الذنوب
لوحدك
وأنا أبليس أشتغل واعظ ولا كمسارى ف أتوبيس
يا عم دا أنا زمان كنت أستنى حد ينسى يسمى
وهو بيأكل لقمته
دلوقتى كل أكلكم ملوث
وبصراحه الواحد خايف على صحته
ده مفيش ضمير أساسا
علشان أموته
كل واحد بمزاجه خربانه ذمته
يا عم دا كل حاجه أتسرقت
وكده الأجيال الجديده من الحراميه
... أتظلمت
يا راجل دا من كتر ما لطشت معايا
خرجت ف مظـــاهره مع الناس اللى بتقول كفايه
!!وبرضـــه مفيش فايــــده

11 comments:

Unknown said...

ايه الجمال ده
بجد القصيده حلوه اوي و تعبير عن الواقع الي بنعيشه بجد احنا تفوقنا علي ابليس و توبنا كمان

فكرتني بالنكته بتاعت مبارك استعان بابليس علشان يقوله يعمل ايه مع الشعب المصري و كل ما ابليس يقول حاجه مبارك يقوله لا يا راجل ايه لعب العيال ده فابليس سأله هو انت بتعمل ايه مع المصرين مبارك جاوب ابليس قاله يا راجل حرااااام عليك اتقي الله

بوست مميز كالعاده

kareem azmy said...

بجد قصيدة رائعة
و بتعبر عن الواقع المر اللى احنا بنعيشة

بجد حرام و كفاية
انا متهيالي ان ايام الاحتلال الاجنبي كان الناس عندها اخلاق و حب و رحمة عن دلوقتي

ربنا يسترها معانا

دكتور حر said...

جميييييييييله القصيده
يا عم مصطفى


كان في مقال في الدستور من فتره
كان عنوانه بيقول

رسالة من الشيطان الى الحكومه ... دعوني احني رأسي حتى تلامس قروني الأرض اجلالا لما تقومون به ولم يخطر على بالي انا شخصيا
القاكم في جهنم


مشكور على البوست

Dr. Eyad Harfoush said...

رائعة هذه القصيدة ، الصورة الشعرية الكاملة ممتازة و أوحتلي بفكرة قصة قصيرة عن ابليس في زماننا
تحياتي و تقديري

مصطفى محمود said...

ايمى :

سعيد ان القصيدة عجبتك يا ايمى


كريم :

عندك حق اى نظام ارحم من دة

دكتور حر :


(
رسالة من الشيطان الى الحكومه ... دعوني احني رأسي حتى تلامس قروني الأرض اجلالا لما تقومون به ولم يخطر على بالي انا شخصيا
القاكم في جهنم)

رائعة ..نفس الفكرة تقريبا ،
اهلا بيك

د.اياد:

النظام متغيرش كتير يا دكتور ... وقصيدة ابليس صالحة من زمان لحد الان



تحياتى

EGYPT EYES said...

جامده القصيده هو على سلامه رائع بصراحه
كلاماته بتعبر دايما عن حال الناس بطريقه فجوميه محببه
تحياتي يادرش

حسن ارابيسك said...

كل الشكر من قلبي
على مجهودك في نقل تلك القصيدة الجميلة
لعلي سلامة وياريت المزيد المزيد
فعلا على اسم مصر التاريخ يقدر يقول ماشاء

مدحت محمد said...

هههههههههههه
والله ابليس صدق فعلا
ههههههههههه
الراجل اتضايق من ذنوبنا
هيتوب على ايدينا خلاص
ههههههههههه
والله جامدة
جدا
تحياتى

تائهة فى أرض الأحلام said...

يابخته قدر يعبر عننا فعلا

كلمات جميلة أهنئك عليها
والى مزيد من التقدم

Anonymous said...

ممم
قصيده حلوه

بس معتقدش ان السبب هو ابليس بس


السبب هو سكو ت الدكتاتور الاعظم

الله



انا رجعت تانى يامصطفى للتدوين والحكايه اللى حصلتلى كتبتها كلمه

ياريت انت وكل النسا تدخل عشان يعرفوا

المدون الشرير ده مين ويحزروه لانه مش طبيعى


شكرا ليك ومزيد من العطاء

مثلى قوى

مصطفى محمود said...

عيون مصر / حسن ارابيسك/ ضحى / تائهة فى ارض الاحلام او اوشا /

مثلى قوى :


شكرا على مروركم واتمنى احصل على متابعتكم على طول


تحياتى