Friday, August 17, 2007

مستقبل النضال فى غزل المحلة


نظم مركز الدراسات الاشتراكية يوم الجمعة ندوة عن مستقبل النضال فى غزل المحلة

حضر الندوة العديد من القيادات العمالية والنقابية وبعض الناشطين السياسيين والاعلاميين والمدونين
















الجمهور يستمع للاستاذ ايهاب من غزل شبين




















كان فى اعلاميين كتير بيغطوا الندوة
















تحدث الكثير من القيادات العمالية عن تجربة غزل المحلة ودورها الطليعى لعمال مصر والتى كانت الشرارة التى فجرت موجة الاضرابات الاخيرة والهمت الكثير من العمال فى كل القطاعات .
تحدث النقابى محمد عبد المنصف من طرة الاسمنت : عن ان العمال يشعرون انهم يتعاملون مع احتلال اجنبى حيث يواجهون اضطهاد غير عادى من الدولة المصرية سواء فى تدنى الاجور او التعامل الامنى مع العمال النقابين ومع اى نشط فى الاضرابات كما حث على تكاتف جميع العمال فى كل القطاعات ضد المعاش المبكر لاننا الدولة الوحيدة التى لديها هذا النظام وروى ان العديد من العمال الذين خرجوا من المعاش المبكر بعدما نفذت اموالهم عادوا للعمل من جديد ولكن فى صورة عمالة يومية باجور تافهة اقرب للتسول منها الى العمل وانة حتى الان للاسف قد خرج 1200 واحد بالمعاش المبكر ولا شك ان هذا يمثل كارثة لعائلات هؤلاء العمال.
















كريم البحيرى كان موجود هناك صاحب مدونة عمال مصر




كريم كان منفعل وهو بيتكلم وانتقد اسلوب تنسيق القيادات مع الدولة وقال انهم لازم يكونوا اكثر صرامة معاهم















حضر فى الندوة بنى ادميين من كندا زى مانتوا شايفيين ، دة قسطنطين عضو النقابة العمالية الكندية وهو وبعض زملائة منظمين هناك حملة مقاطعة ضد السلع الاسرائيلية مع اقوى 3 نقابات هناك
ونعم الرفاق والله .















محمد عبد المنصف كان بيقول احنا مستنيين دور اكبر للطلبة فى دعم العمال زى زمان وان الطلبة كان ليهم دور اساسى فى كل النضالات الشعبية فى مصر بس الدور دة اصبح مفقود او مش بنفس القوة والتاثير بتاعة زمان

ايهاب كمان اتكلم وقال انغزل شبين فيها كوارث لان قبل الادارة الجديدة فى المصنع كان بيتم اقتطاع نسبة من الارباح ما بين خمسة : عشرين فى المية علشان التطوير وزيادة الاستثمارات وبفضل الالية دى كان فى دايما رصيد للتطوير والتوسع ..دلوقتى د.عبد العزيز حجازى خد كل الرصيد بتاع الشركة وضخة فى خزينة الدولة ودى ادى لنتائج كارثية على مستقبل الشركة وقال ان الحكومة بترفع ايدها من دعم قطاعات الغزل والنسيج من فترة ما قرروا تحرير سعر القطن وعندما تم تخفيض الدعم من 36% الى 15%

ومن المعروف ان عدد العاملين بهذ القطاع بكل مراحلة قد يتكون من 3 او 4 مليون اسرة مصرية تواجة اخطار الافقار والتسريح من العمل ودى بعض الاسباب اللى خلت العمال تنظم الاضراب فى شبين

















استاذ محمد عبد العظيم كان موجود وقال : ان الدولة دائما بتسعى للوقيعة بين العمال لتشتيهم وبث الفرقة بينهم وازاى بيوزعوا منشوارات داخلية قذرة كلها شتيمة واتهامات للقيادات العمالية وجاب نسخة من بعض المنشورات دى وقالنا ان من كتر جبنهم المنشورات بتتوزع بطريقة سخيفة اوى ..بيرموها فى الارض وخلاص علشان عارفين لو حد اتمسك وهو بيوزعها العمال هيقطعوة





















لقطة لكريم وهو بيتلصص علشان ياخد صورة هههههههههههههه
















كمال خليل:


اتكلم عن ضرورة واهمية الحزب العمالى الثورى واللى هيوحد كل عمال مصر ويوحد مطالبهم وازاى اننا عايشين فى مقدمة ثورة اجتماعية شايفين مظاهرات الفقراء المصريين ومظاهرات علشان العطاشى من المصريين المحرومين من المية فى بلد النيل! وانتفاضات المهنين اللى فى الازهر والمعلمين والصحفيين كل القطاعات اصبحت بتعانى من النظام بشدة ووضح ان النظام لم يقمع العمال لانة اصبح ديمقراطى فجاة ولكن علشان العمال كانو اقوى ومنظمين وقدروا بدة ينتزعوا حقوقهم منة وقال ان مش ضرورى يكون العمال ثوريين فى بداية صراعهم مع الدولة ولكن وعيهم بيتطور خلال تقلبات الصراع الطبقى ودة اللى بيخليهم فى الاضرابات اكثر راديكالية (جذرية) من كتير من القيادات العمالية.

















واتكلم حمدى حسين :

عن دور القيادات العمالية فى بناء المواقع النشطة العمالية والنقابية وقال ان مش لازم القيادات يزعلوا لما الادارة تنقلهم لانة بكدة هيوصل الرسالة لعمال تانيين ودة دور اى قيادة عمالية شريفة
كانت ندوة اكثر من رائعة
كان معكم مصطفى محمود من وسط ميدان الجيزة

5 comments:

امام الجيل said...

اول تعليق
جميل اوى هذا الحضور
العمال هما على فكرة اللى ممكن ييجى الحل من ناحيتهم وده اجمل ما حدث منذ بدء خطوات الانفتاح والخروج للشارع هو خروج العمال لانهم الغلابة الطيبين مش سياسين ولا مناضلين وهو ده المطلوب ان دول اللى يتحركوا لانهم غالبية الشعب فبجد اذا اتحركوا كلهم والله هتبقى قربت جدا وربنا يسهل
وشكرا ليكم عملكم هذا وربنا معانا

فى القلب said...

ياه ده انت طلعت أشتراكى كبييييير
بس أحسن حاجه فيك انه من غير تعصب
ربنا معاك لما فيه صلاح الامه
أنا كنت بعلق عندوينكى
وقرأت أنك حضرت وزعلت جدا انى مشفتكش
لا أنته ولا حد من البلوجاريه
مع أنى سالت وينكى فى بلوجر غيرى عشان اسلم عليهم
بس الظاهر الفرحه كانت منسياه كل حاجه
عموما الجيات أكتر أن شاء الله

maro said...

اخى العزيز
عندى ليك اضافه
انت تعرف ان شركه غزل المحلة لحد الان بيتعاملوا بالمليم ؟
اه و الله
العمال لما بيزيدوا بيزيدوا بالمليم و لما بيقيضوا بيقبضوا بالمليم و مستعد ابعت لك اذن صرفيه من اللى بيخدوه ساعة القبض
و شكرا لك
محمد مارو

مدونه انا بحبك يا مصر said...

اولا وحشنى كتير ممكن خدمه افتح المحمول بتاعك كل مكلمك يقول مغلق متعملش مهم
ثانيا تغطيه جيدة انا بصراحه جتلى الدعوة بس مقدرتش اجى بس البوست خلنى كانى جيت
احمد الجيزاوى

مصطفى محمود said...

امام الجيل :

مشكور حضرتك على التعليق ، واعتقد فعلا ان العمال فئة هامة جدا من قوى التغيير والتى يجب ان نلتفت اليها جيدا .


فى القلب :

اهلا بيكى .. انا بردة سالت وينكى فى بلوجرية غيرك قالتلى مفيش غير كريم ونحو حياة افضل . معلش تتعوض المرة الجاية
نورتى المدونة .


مارو:

مشكور يا مارو على جهد المتابعة واتمنى بجد تبعتلى صورة اذن الصرف دة لو عندك . وشكرا ليك حبى .


جيزاوى :

انت فييييييييييين يا راجل شكلك روحت العراق وجيت .
موبايلى مغتوح يا معلم فى كل الاوقات نحن فى الانتظار والخطوط غير مشغولة ... فقط حاول الاتصال مرة اخرى هههههههه.