Wednesday, March 28, 2007

فضفضة


مساء الخير ..او صباح الخير اى حاجة


انا جاى اطمن عليكم اوعى يكون فى حد نام هنا معندناش بطاطين ومش لاقين ناكل ، النهاردة عايزين نفضفض بقى زهقنا مقالات وكتابات والكلام دة وانا اسف جدا لو كنت اتاخرت عليكم (قال يعنى فى حد بيشوف المدونة غيرى ) المهم

اخباركم اية وحشتونى وطبعا فى ناس بتسال عليا (بتخيل يا اخى ) الحمد لله كويس

الاسبوع دة كان حافلبجد يمكن من اخر الحاجات اللى فية موضوع التعديلات وانا عايز اقولكم يا ما قلتلكم دى حكومة وسخة مفيش منها فايدة وانتوا تقولوا خلينا معاها يا شباب والله خربانة ...برضة تقولوا لسة شوية ..طيب اعمل لكم اية علشان تعرفة انها حكومة وسخة؟! وسؤال بقى للناس اللى راحت وقالت لاء بالجامد اوى انت عارف انت رحت علشان اية، انت رحت علشان تختار طوارىء بس ولا طوارىء ومعاة قانون ارهاب هدية !! طيب انت رايح تمعل اية بقى ؟ هتقول انا ايجابى هقولكم اتنيل هو فى فايدة ماهى هتتزور هتتزور يبقى قاطع احسن ولا هو فضى وخلاص ..سامع ناس بتلسن وبتقول محدش شافك فى المعمعة يا نجم يا بتاع اليسار يا احمر انت

هقولكم انا كنت فين بس من غير قلة ادب ..الموضوع ان طول الاسبوع دة كنت بحضر لمؤتمر القاهرة ودة حدث مهم جدا وبصراحة كان القبض عليا هيعطلنى اوى وبصراحة اكتر علشان عندى امتحانات كمان شهرين وربنا يستر فعلشان الاسباب دى انا مروحتش التحرير فهمتوا بقى !! ولا مفهمتوش مش فارقة بصراحة انا مخنوق جدا ومش طايق نفسى وحاسس اننى بعد ما اخلص هيتقبض عليا بسبب قانون الارهاب ،

النهاردة صديقى المخرج حكالى موقف عن واحدة كومبارس كانت حامل وسقطت اثناء التصوير .. والمخرجين قعدوا يشتموها ويبهدلوها طبعا بعد ما ودوها المستشفى لكن السؤال اللى لازم نسالة بغض النظر عن جهل الست دى ..اية اللى يخلى واحدة حامل تنزل تشتغل برضة؟ ببساطة علشان مش لاقية تاكل ومحتاجة كل قرش بتاخدة قد كدة الاوضاع الانسانية اللى فى مصر وتزايد معدلات الفقر بين الناس لدرجة مفزعة ومخيفة بتخلى الناس تقدم على حاجات صعبة اوى غصب عنها البعض بيسال عن اية سبب الازمة الاخلاقية والثقافية اللى عندنا هقولكم الفقر ..الفقر بينسف اى اخلاق او قيم او حتى دين عند الناس لما الناس تبقى مخيرة انها تسرق او تموت من الجوع يبقى لازم تسرق..يبقى لازم تقتل علشان تعيش كان فى مشهد بحبة اوى لعمر الشريف فى فيلم صراع فى النيل كان مضايق اوى علشان مش عارف يجيب لحبيبتة اى حاجة ..وامة سالتة :

مالك يبنى اية اللى تاعبك ؟


قالها وهو بيصرخ ورمى الكرسى فى القزاز :


الفقر


الفقر



الفقر اصبح سمة حقيقة فى كل شوارع وحوارى مصر ..الجوع ...اللى بيحاصرنا ..الاوضاع البشعة اللى حوالينا ..


انا مش عارف ان يكتب فى اية بس انا مخنوق وبفضفض معاكم ..انا بس عايز اقولكم قبل ما انام مشكلتنا الحقيقة هى الفقر الفقر الفقر ...ولازم نعرف اسبابة علشان نعرف ازاى نعالجة


واسف لو عطلتكم ....الاقى واحد يقولى اية المقال الغريب دة ...بقول بصوت عاااااااااالى .. يعم دى فضفضة

وتصبحوا على خير


Friday, March 23, 2007

بيان الطلاب الاشتراكيين حول التعديلات الدستورية







منذ ان اعلن الحزب الوطنى عن رغبتة فى تعديل مواد الدستور بعد ان كان هذا (منذ فترة قريبة) عار وخيانة وطنية ثم اصبح فتحا سياسيا عندما اعلن مبارك عن ذلك وبالرغم من اننا حذرنا مختلف التيارات الاخرى من عدم جدية اصلاحات الحزب الوطنى السياسية الا انهم ابو الا ان يستمروا فى مجاراة الحزب الوطنى فى لغوة الدستورى والذى انتهى فعليا بمجرد تعديلات شكلية للغاية ولم تمس اى مادة جوهرية اللهم الا الغاء كلمة الاشتراكية من الدستور الغاء عبارة (المكاسب الاشتراكية ) وتحالف قوى الشعب العاملة ..الى اخر هذة العبارات . والامر الاكثر سؤا انهم يريدون تمرير مادتين فى غاية الاهمية الاولى هى المادة 88 والتى تنص على الغاء الاشراف القضائى على الانتخابات و تقرير قانون الارهاب هذا القانون الذى يعد بحق الضمانة الحقيقة للتوريث وللفساد السياسى المستمر من قبل الحزب الوطنى لان يعطى الحق لاجهزة الامن فى التفتيش واقتحام البيوت والاعتداء على الحريات الشخصية ويتضمن ذلك (حرمة المساكن -خصوصية الاتصالات -المراسلات) والاعتقال و ذلك بدون اى اذن قضائى الامر الذى سيجعل من مصر دولة بوليسية قمعية رهيبة . يجب ان نضع هذة المواد نصب اعيننا قبل اى حديث عن تاييد التعديلات المقررة من الحزب الوطنى لانها اذا طبقت هذة الحزمة من التعديلات مرة واحدة وبدون اى استثناء وخاصة المواد 88، 179.الخاصين بالغاء الاشراف القضائى وبتفعيل قانون الارهاب والذى لن يستبدل بقانون الطوارىء كما يعتقد الكثيريين ولكن سوف يتم العمل بقانون الارهاب وقانون الطوارىء جنبا الى جنب ..فان هذا سيؤدى الى تعميق الازمة السياسية المصرية وللمزيد من العراقيل امام الاصلاح الحقيقى...فالى هذا الحد وصل رعب النظام من الحراك السياسى الحثيث الذى شهدتة مصر فى الفترة الاخيرة ويسعى بكل قوتة بالقضاء علية .من اجل هذا كلة و استنادا على كل اسبابنا المنطقية التى اوضحناها ندعو جميع المواطنين بمقاطعة الاستفتاء يوم الاثنين وذلك لتفويت الفرصة على الحزب الوطنى باستغلال اعداد المواطنين فى الدعاية للتعديلات ومن ثم تزويرها كالعادة ونسب نتيجة الاستفتاء المزورة الى المواطنين .
ضد الدولة البوليسية
ضد التعريجات الدستورية
ضد الاستفتاء الهزلى
لنقاطع يا رفاق هذة الملهاة
...لنقاطع الاستفتاء .

الطلاب الاشتراكيين

Sunday, March 18, 2007

لماذا نتظاهر ؟



يمكن من اغرب الحاجات اللى بنشوفها فى المظاهرات لما الناس بتعدى وتشوفنا والامن مكردنا ..الاقى ناس بتقول اية الناس المجانين دى..هيودوا نفسهم فى داهية ..والى اخر هذا الكلام بجد بيجيلى احباط جامد يعنى احنا واقفين علشان مين يعنى وبنتضرب وبنتسحل علشان مين؟ مش علشانك وعلشانى وعلشان كل الناس فى مصر يبقى اقل واجب بما ان حضرتك سلبى تحترم نفسك ومتتريقش علينا وتقدر تضحيتنا بجزء من وقتنا ومجهودنا وساعات حريتنا علشان نعلن موقف فية مصلحة الجميع .طيب الاقى برضة ناس بتسال هو انتوا عالم فاضية ومش وراكو حاجة ؟


يا جماعة الناس اللى بتتظاهر دى مش ناس تانية غيركم بالعكس فينا الطالب والمهندس والموظف والعامل وكل الناس اللى النظام كفرها وخلاص اتخنقت . ولا يعنى احنا مالناش اهل زيكم يخافوا علينا ولا مفيش مستقبل عايزين نعملة ..لكن الفكرة كلها اننا رافضين نعيش زى البهايم زى ما كتيير عايشين ياكلو ويشربوا ويتجوزا وخلصت على كدة شايفين ان الحرية دى شىء جميل وراقى جدا يستحق الواحد يضحى بحرية ويمكن بحياتة احيانا علشان يحققها رافضين الظلم ورافضين القهر وعندنا استعداد نواجة جحافل لامن المركزى بدون خوف مش علشان احنا ابطال لكن علشان احنا عايزين نحقق العدالة والحرية والامن الى محرومين منها واحد تانى يسال يعم انتوا سياسين واحنا مبنفهمش فى الحاجات دى ..اقولكم دى فكرة غبية اوى لية لان كل مطالبنا مباشرة وبعيدا عن السياسة بالمفهوم الشعبى خالص لما نتظاهر علشان الف واحد ماتوا فى عبارة بسبب الفساد وصاحبها يهرب ولما نتظاهر علشان المبيدات المسرطنة والاكل المسمم ولما نتظاهر علشان غلاء الاسعار اظن كل دى حاجات مش عايزة كتب علشان تعلمك ازى تقول اةةةةةةةةةةةةةةةةة


علشان تقول للحرامية يا ولاد الكلب ، احنا بنتظاهر مش حبا فى التظاهر لكن علشان احنا مكويين فعلا من الظلم زيكم يعنى لا تعليم ولا صحة ولا حرية ولا وظيفة ولا جواز ومستغربين اوى ان احنا مش خايفين للامن ومش خايفين يتقبض علينا !! طيب لو متظاهرناش دلوقتى نتظاهر امتى ؟ وهلى هنكون عايشين اصلا لما الاوضاع تبقى اسؤ؟


واحد تانى يقولى يا كابتن انا معاك بس اية الفايدة ما هيلمونا فى عربية واحدة وخلصت على كدة ، اوقولك عندك حق بس لية احنا عددنا قليل لو كل واحد بقى ايجابى هتلاقى الاف نازلين الشوارع اظن ساعتها الحكومة مش بس هتغير سياستها لما تلاقينا بنثور ضد الاوضاع الغلط دة ممكن النظام كلة يقع مش معقولة حد يقدر يحبس شعب بحالة وخصوصا علشان مطالب عادلة زى اللى بنتكلم عليها اكيد اكيد لو اتجمعنا هناثر جامد وكلنا شوفنا لما عمال الحلة اتجمعوا وتضامنوا خدو حقهم ازاى ..انا بس عايز اقول لكل الناس اللى بتمشى جنب الحيط لحد امتى حضرتك مقضيها كدة ؟ يعنى مستنى اية تانى علشان تشتم وتلعن وتتظاهر صدقنى اللى انت فية دة مش عقل زى ما بتضحك على نفسك بية دة جبن وندالة وكل شوية اربى العيال اربى العيال والنتجية لا بيتربوا ولا بيتعلموا ولا بيشتغلوا ولا بياكلو كويس ولا ليها لازمة حياتهم انا بجد عايز افهم مفيش اى شعور بالذنب لما ولادك يسالوك ويقولولك لية يا بابا فضلت ساكت لحد ما الوضع بقى كدة ..لية دايما كنت بتقولنا عيش فار ولا تموت اسد..بجد انت للدرجة دى معندكش اى احترام لنفسك؟


يمكن دة هيجرنا لسؤال مهم وهو اية قيمة الحياة اصلا بمعنى هلى قيمة الحياة هى الاكل والشرب واشباع الغرائز الاخرى فقط ولا قيمة ومعنى الحياة اسمى من كدة ، انا شايف ان اى واحد بيقدر قيمة ومعنى حياتة فعلا لازم يكون ايجابى ولازم نسال نفسنا الناس اللى كانت بتضحى بنفسها لتحرير ارضهم دى لما بتموت ولية مش بترضى تعيش وتاكل وخلاص ..الناس دى بتضحى بحياتها لتحقيق قيمة معينة وهدف بتسعى لية يمكن مش هتعيش علشان تشوفة لكن الناس دى شايفة ان الحرية والعدل والمساواة قيم تستحق التضحية فعلا


وزى ما جيفارا كان بيقول: اذا لم نحترق انا وانت فمن سيضىء الطريق؟



واختم كلامىبقصيدة معبرة جدا لاحمد فؤاد نجم:











القضية



الحكاية والرواية
و القضية والجناية
و الفانلة ف الجونلة
و المخدة ف الملاية
و الارادة
بالشطارة
و الخسارة
ع التكايا
و الأمين مهلباتي
و الأمانة مهلباية
و الصحافة مهلبية
و الاذاعة يا ضناية
ألف ليلة وليلة تندب
ع الهوى
و تقول هوايا
و المشايخ كل شايخ
ف الفساد
يهدي الهدايا
و القناعة
للجواععى
و البضاعة
للهبايا
و البوليس ف اليغمة طايح
بالطبنجة و العصاية
ديب غريب
من غير كمامة
يهبش التوب و العباية
و القضية
يا قضايا
بالمكايد و الوشاية
دبروها و فصلوها
بالمقاس
لبست قضايا
و العدالة بالندالة
عطلوها و هي جاية
و الحكاية و الرواية
و القضية و الجناية
الحكاية عايزة قعدة
و الكلام
ملوش نهاية

الحكاية ان البلد
مش ملك ناسها
و الخلايق ف البلد
مش مالكة راسها
و البلد أصلا
بلدنا مش عليلة
البلد علتها جاية
من خرستها

شوف يا صاحبي
ما انت شايف كل حاجة
بس خايف

الحقيقة بنت كلمة
و الكلام لازم يدور
سندباد مواله عالي
ف المداين .. و الكفور
الكلام الكلام
يكسر القيد و اللجام
الكلام الكلام
يدفع الناس للأمام
شوف يا صاحبي
هي كلمة
دايرة ف وسط الزحام

البلد مش عايزة قعدة
و كل منهو بكلمتين
البلد عايزة المجاهدة
باللسان
و بالادين
كلنا و من غير معهادة
للبلد علينا دين
يكبسونا
يحبسونا
يضربونا كرباجين
البلد سامعة و شاهدة
و كل خرم قصاده عين



****************





























تانى مظاهرة تتمنع ..وبعدين ؟

يوم الخميس كان يوم مشهود فعلا تقريبا نص اللى اعرفهم اتقبض عليهم ..وبصراحة الشرطة كانت حيادية جدا مفرقتش بين يسارى ويمينى كلة فى العمبوكة واحد ...وعلى راى عادل امام فى بودى جارد :

احنا عندنا وحدة وطنية ...مسيحى مسلم كلة بياخد على قفاة

انا يادوبك خدت الميعاد وكنت رايح لاقيت الموبايل بيرن ..فية اية عندك فرح بليل ..بصراحة انا قلت هروح المظاهرة واقطع نفسى بتاع ساعتين واشد مع الامن وكدة هتبقى الساعة 8 ولسة هروح اغير هدومى واروح الفرح هتبقى مخمطة جامدة ..قلت خلاص بقى اروح الفرح واكنسل المظاهرة دى ..اتارى دى كانت مظاهرة مشهودة ..وكالعادة اى مظاهرة اغيب فيها اعرف ان فى مصيبة هتحصل ..يعنى مثلا اليوم اللى اغيب فية الناس تنضرب ..او تتسحل ...يوم الاستفتاء الاسود دة مثلا ..كنت عيان ..والناس ساعتها قضيتها بالمايوهات عند النقابة وكانت ليلة ...خلصت الفرح والاقى الناس بتتصل ...فلان اتمسك ...وبعدية فلان ..وبعدية فلان ...يا خبر ابيض؟ انا قلت مفيش غيرى استخبى بقى ولا اية ؟
بس انا فعلا زعلان اوى من الشرطة انها منعتنا من التظاهر ...دة احنا بقينا عشرة من ايام انتخابات الرئاسة ....ةتقريبا عارفين بعض واحد واحد ..معارضين (او نشطين سياسيين زى ما بيسمونا) و امن! وبعدين دة احنا بقالنا كتير مشوفناش بعض حتى مظاهرة النقابة الاخيرة قفلتوا الشوارع المؤدية ليها كلها ..والناس يعينى وانا منهم قعدنا نلف حوالين النقابة لما زهقنا ...بس زى مابيقولو العشرة متهونش الا على ولاد الحرام....الشرطة خدتها فرصة وعزمت الناس عندها فى القسم ..واهو عشوة ونومة ..وكل واحد باصلة .....وعلشان المتظاهرين مؤدبين وولاد ناس...فمقعدوش عندهم غير يومين بس ...واهو يا بخت من زار وخفف ..بردة الناس دى وراها مصالح يا جدعان ..دة فية اكثر من 20 الف معتقل غيرهم حسب كلام العادلى سخصيا ..دة غير المعتقلين المستوردين ..اة والله ..اللى هما بيجلونا عن طريق المخابرات المركزية الامريكية وال اف بى اى ....من كل جنسيات العالم ..علشان نشرح فى ميتينهم هنا ...دة غير دورات التدريب الامريكانى فى التعذيب... وطبعا الحوافز شغالة على ودنة .....دة غير قسم امن الدولة اللى بيراقبوا الناس ...تخلوا يا جماعة واحد قاعد 24 بيتصنت على نشط سياسى ابن كلب مننا ...شوف المجهود يا عينى ...اى نعم هو بيبدلوا فى الدوريات علينا بس بردة مجهود ولازم نشكرهم ...دة غير كمان قسم اختراع التهم ...االى اخر منتجاتة ..تهمة تكدير الامن العام ...وتعطيل المرور !! وحاليا بيتم التسويق لتهمة جديدة وهو احداث ضرر فى العلاقات المصرية الفضائية ... دة غير قسم التفنيط ...
لما المعتقلين يدخلوا عليهم ...فالحسبة المعتادة ..اى دقن او زبيبة صلاة يبقى اخوان ...ميدالية جيفارا ..يبقى شيوعى ...وهكذا ..
وبما ان اخوكم محضرش المظاهرة وفى كلمتين متحاشين فى زورى ....يبقى نبخهم هنا ونخلص

يسقط يسقط حسنى مبارك

وفى النهاية طبعا بشكر الصديق اللى عزمنى على الفرح طبعااااااااااااا

هههههههههههههه

Friday, March 16, 2007

الى محمد الطاهر



من اليسار محمد الطاهر ثم عبد الحى وبيتر ووائل
:محمد الطاهر صاحب مدونة
مواطن مصرى واخد على قفاة
من اكثر المشاغبين على النت واول واحد بيغطى مظاهراتنا ..طاهر وكيل طلاب حزب الغد ومن ابرع مصورين الغد
يتميز طاهر بفكرة اليبرالى الاسلامى وربما يتضح ذلك من خلال تدويناتة الرائعة
وربما يتميز ايضا بعصبيتة ومقتة الشديد للامن
احزننى كثيرا نبأ القبض عليك يا طاهر انا لسة حالا راجع من القسم وعرفت انك خدت افراج بس ولاد الكلب شكلهم هيطلعوك الصبح
انا مش عايز اقولك خليك بطل والكلام دة لان عارف انة موقف صعب وعارف انك هتستحمل بس صدقنى خدها فرصة تقيم فيها تجربتك واهدافك وهل فعلا انت مستعد تتعرض للاعتقال تانى واية هى القضية اللى تستحق تضحى بحريتك علشانها بجد
انا مش قصدى اخوفك ولا حاجة بس اتمنى تعيد ترتيب افكارك .. وعلى فكرة انت بقيت شهيد التدوين فى مصر حاليا بعد كريم
بس انا لو منك مطلعش دلوقت واستنى كام يوم لحد ما الحكاية تسخن شوية واسمك يتشهر ومين عارف يمكن كوندا تيجى تشتكى لمبارك علشان يطلعك واهوة كلة رزق للمدونة بتاعتك.
بجد مش عارف اقولك اية ...بس الشىء الوحيد اللى عارفة انة السجن تجربة خالدة وهتتحفر فى ذاكرتك للابد وعامل اكيد فى تقوية عزمك وروح النضال ..ولعلمك انا بحسدك سيبك من انها تجربة صعبة بس هى فعلا فرصة علشان تقيس الى اى مدى قدرتك على النضال والتضحية ...وسؤال كلنا لازم نجاوب علية ...هل كلنا مستعدين نتعرض للاعتقال علشان مواقفنا الفكرية ونضالنا ضد النظام زى محمد الطاهر ؟
كلمة اخيرة :
شد حيلك يا ابو طاهر السجن للرجالة ...وانك تتسجن يبنى فى ظل النظام دة ...يبقى دة اكبر وسام على صدرك
مدونات مصر كلها مستنياك علشان تحكيلها ازاى مريت بالتجربة دى
و مستنيك تخرج علشان اشوفك
اخوك لينين

Tuesday, March 13, 2007

سلام يا صاحبى




اليومين دول اخوكم بعد ما ساب الغد وربنا تاب علية بقيت اروح حزب الغد واقعد مع الناس اللى كانت زملاء العمل الحزبى بصفتى من الاشتراكيين ..بينى وبينكم الوضع غريب عليا الفترة دى .. هو شعور غريب شوية انك تدخل مكان عشت فية سنتين وعارف كل ركن فية وكل شخص هنا بس انت حاليا مش معاهم ومع تيار سياسى تانى .. لحد الان اصحابى مش متصورين انى بقيت اشتراكى بجد وفاكرنى يومين وهرجع (لعقلى) وانا كمان مستغرب انى بتكلم معاهم بصيغة تانية .. بس هى الدنيا كدة ولولا اختلاف الراى يا محترم ..على راى صلاح جاهين ... بصراحة تجربة الغد تركت فيا معالم عميقة فى نفسى اوى يمكن لانة اول حزب اشترك فية ويمكن علشان كان نافذتى الاولى فى عالم السياسة والفكر، لكن اجمل حاجة شوفتها فى الغد هى الناس بتاعتة وخصوصا اصحابى هناك يمكن من سنة وشوية لما كنا شباب جديد فى الحزب انا وبلال وطاهر وغيرهم وكنا بنتعلم مبادىء الليبرالية من قطب مكنتش متصور ابدا اننا ممكن نفترق ابدا واننا ممكن نبقى فى جبهتين ضد بعض او متعارضين مع بعض كليا زى دلوقت ، لكن اول مرة حسيت فيها بانى تركت الغد بجد لما كنت مع طاهر وقالى انتو عندكم (قصدة الاشتراكيين) بتقولو كذا ..
كنت اول مرة اسمع الكلمة دى عندكو؟ احنا وهما ! ساعتها عرفت ان السياسة فرقتنا بجد بس اتمنى ميكونش دة على المستوى الشخصى . يمكن انا مش اول واحد يغير فكرة او ينتمى لتيار سياسى مختلف بس الوضع الجديد عاملى لخبطة شوية فى حياتى
وكل ما اقعد مع بلال ولا طاهر بصفتى اشتراكى وهما غد وافتكر كنا بنتفق مع بعض زمان و ازاى كنا بنقعد القعدات دى وقد اية احنا فاهمين بعض بحس شعور غريب اوى وعلى طول انا وبلال بنتبادل الابتسمات خلال الندوات
وحتى لما جة يوم الطالب العالمى كنا نفس الصحبة ونفس الهمة لكن النفوس اتغيرت واختلفت كتييييييييييير
السنة الى فاتت كنت نازل غد ودلوقتى اشتراكى !! الحياة فعلا عجيبة
ومش عارف لية فى بالى فيلم سلام يا صاحبى وانا بكتب دلوقت
فى النهاية احب ارسل اهداء لكل الناس الحلوة اللى فى الغد ..
اكراما للعشرة الجميلة وللايام الخوالى

وسلام يا صحابى

Monday, March 5, 2007

حكاية مدونة

اهلا بيكم فى مدونتى ....اللى اخيراااااااااا شافت النور بعد العديد من المشاكل والازعاج .. من اهمها غياب الخبرة التقنية ..وغياب الوقت وغياب فلوس الانترنت!! بس ولا يهمكم المدونة اخيرا طلعت وخلاص
ومعلومة بقى ..المدونة المفروض خلصانة من 6 اشهر تقريبا بس الظروف بقى


المهم يعنى اهلا بيكم

وهتلاقو عندكم مواضيع قديمة شوية ...متاخدوش بالكم ..اللى عايز يقراها يقراها ....واللى مش عايز بنفس راضية كدة يسيب اى تعليق ولا حاجة ..ولو فى تبرعات مفيش مشاكل .

بالنسبة للمواضيع القديمة زى مثلا عن التطبيع وموضوع هتلاقو طريقة تفكير مختلفة تماما عن موضوع لماذا نعادى الامبريالية لانى كتبت الاول وانا عندى رواسب ليبرالية ..بس الحمد لله تبت
والمفروض كنت اشيل الموضوع او اعدلة تبعا لفكرى الحالى بس انا قلت اسيب المواضيع القديمة لانها مؤشر على نضوج وتطور الفكر الخاص بى

فمن جحيم الليبرالية .....الى جنة الاشتراكية ...اكيد هحكيلكم اية اللى حصل معايا فى وقت قريب
واية اسبابى المنطقية اللى خلتنى اسيب الليبراليةو اتجة نحو اليساااااااااار

اهلا بيكم مرة تانية واتمنى المدونة تعجبكم ..واتمنى متمسكش زى كريم

وربنا يستر


اة نسيت ...المدونة دى كانت تحت اسم هتلر ...وانا غيرت الاسم الفاشى دة وجارى تعديلة فى المنتدى (كل الطلبة) المدونة مكتوبة باسم لينين ..ودة الاسم اللى هيبقى فى المنتدى وكل ايملاتى

واخيرا نعلن اطلاق ..على اسم مصر ... فى الفضاء النتى


والسلام عليكم ورحمة الله وبركاتة




نوال السعدواى


نوال السعداوى


ربما من اشهر المفكرين المصريين واكثرهم كراهية لدى قطاعات كثيرة فى المجتمع المصرى

ولكنها فى نظر بعض القطاعات المعينة هى الشيطان الاكبر والخطر الحقيقى على الامة .حتى راينا من يدعو لقتلها او لرجمها او لسجنها ، وربما كان اخر ما اثارتة نوال السعداوى هى اصدار رواية تتحدث فيها عن الله ..والرواية كما اكد الكثيرون فهى تعبر عن رؤية اللحادية

وكالعادة اصدر الازهر بضغط من هذة القطاعات قرار بمنع الرواية! بل وبتجريمها ! هكذا اصبحنا نجرم الناس على افكارها وعلى ارائهم الى ان هربت نوال الى الخارج ، ولكن يحق لنا ان نتسائل ما دخل الازهر بالادب والروايات والكتب ؟

ومن الذى يخول لة ان يصادر اراء الناس ويؤل كلامهم ومقاصدهم ؟

اذا لم يعجب احد بكلام نوال فليصدر رواية او كتاب ليرد عليها اما مصادرة الرواية فهو اجراء متخلف ورجعى للغاية ..ناهيك عن جدوى المنع اصلا .فهل من المتصور فى ظل انتشار الافضائيات والانترنت والكتب ووسائل الاتصالات الحديثة ان يستطيع احد ان يمنع اى راى او فكرة او ديانة عن الناس حتى لو اراد . ثم باى حق يمنع احد الاشخاص رواية اصدرها شخص ما (هذا لو استطاع اصلا ) ثم هل من حق المجتمع المسيحى ان يمنع صدور رواية تنتقد المسيحية ، وهل من حق المجتمع اليهودى ان يمنع رواية تنتقد اليهودية ، بل هل من حق المجتمع الملحد ان يمنع صدور رواية تدعو لعبادة الله؟

ان رفضى لهذة الفروض هو ما يجعلنى ارفض ماحدث لنوال السعداوى فليس من حق اى احد منا ان يولى نفسة رقيبا وحارسا على الافكار مدعيا انة يحمى الناس .فالانسان بالغا بما فية الكفاية ليحدد بماذا يريد ان يؤمن

كريم اتمسك يا رجالة

منذ ان علمت الحكم الذى صدر على كريم عامر وانا مستاء للغاية ليس من الحكومة او من اصدار القضاء حكم كهذا فعلى اى حال كل شىء متوقع من مجتمع متخلف تراسة سلطة قمعية مثل النظام المصرى ، ولكن الذى اثار دهشتى واحزننى كثيرا اننى وجدت بعض المدونيين يرحبون بالحكم ويهللون فرحا !! انهم يدعون بان كريم قد سجن لانة انتقد الازهر بينما نعلم جميعا ان ة سجن لسبب اخر ...وهو انتقادة لمبارك ..هل من المعقول ان يوافق مدون على ماحدث ؟ انة بذلك يعطى النظام الفرصة لرمينا جميعا داخل السجون بتهم مختلفة ومتنوعة
وحقيقة لقد صدمت فى بعض المدونيين الذين يدعون التنوير والتسامح وتقبل الاخر ...عندما وجدتهم يهللون لحكم الادانة ! هل اصبحنا فى مجتمع يصارد فية راى الناس ويزج بهم داخل السجون لمجرد انهم يخالفونا الراى؟

والغريب ان الحكومة فعلت ذلك باسم الدفاع عن الدين !! حسنا ولكن هل اخبرهم دينهم

(ان وجد)

ان يتعاونوا مع اسرائيل لسحق المقاومة فى لبنان وفلسطين ؟